കൊല്‍ക്കത്ത : മുഖ്യമന്ത്രി മമത ബാനര്‍ജിയുടെ വീല്‍ചെയറിലൂടെയുള്ള തെരഞ്ഞെടുപ്പ് പ്രചാരണം വലിയ നാടകമെന്ന് ബിജെപി നേതാവ് സുവേന്ദു അധികാരി. ബംഗാളിലെ തന്നെ ഏറ്റവും വലിയ അവസരവാദിയാണ് മമതയെന്നും ആരോപിച്ചു. തെരഞ്ഞെടുപ്പില്‍ സഹതാപം ഉണ്ടാക്കിയെടുക്കുന്നതിനായാണ് മമത വീല്‍ ചെയറില്‍ ഇരുന്നുകൊണ്ട് ഇപ്പോള്‍ തെരഞ്ഞെടുപ്പ് പ്രചാരണം നടത്തുന്നത്.
നന്ദിഗ്രാമില്‍ സുവേന്ദു അധികാരിക്ക് എതിരായാണ് മമത മത്സരിക്കുന്നത്. കഴിഞ്ഞ തവണ നന്ദിഗ്രാം ഉള്‍പ്പെട്ട പാര്‍ലമെന്റ് മണ്ഡലത്തില്‍ നിന്നും സുവേന്ദു ജയിച്ചിരുന്നു. തുടര്‍ന്ന് ബിജെപി ആവശ്യപ്പെട്ടതിനെ തുടര്‍ന്നാണ് നിയമസഭാ തെരഞ്ഞെടുപ്പില്‍ നന്ദിഗ്രാമില്‍ നിന്നും ജനവിധി തേടുന്നത്. താന്‍ മുഖ്യമന്ത്രി സ്ഥാനാര്‍ത്ഥി അല്ല. ജനങ്ങള്‍ക്ക് തന്നില്‍ വിശ്വാസമുണ്ട്. അതിനാല്‍ മമതയെ തോല്‍പ്പിക്കാന്‍ ആകുമെന്ന് പ്രതീക്ഷയുണ്ടെന്നും സുവേന്ദു അധികാരി അറിയിച്ചു.
മുഖ്യമന്ത്രി മമത ബാനര്‍ജി വീല്‍ ചെയറില്‍ നടത്തുന്ന പ്രചാരണം നാടകമാണ്. ജനം ഈ നാടകം തിരിച്ചറിയും ജനങ്ങള്‍ക്ക് വേണ്ടത് വികസനമാണ്. കഴിഞ്ഞ പത്ത് കൊല്ലം അവര്‍ ഇവിടെ തൊഴില്‍ നല്‍കിയില്ല, വികസനവും കൊണ്ടുവന്നില്ല. ഇവയൊക്കെ വാഗ്ദാനം ചെയ്ത് ജനങ്ങളെ കബളിപ്പിക്കുകയായിരുന്നു. ജനം ഇതെല്ലാം തിരിച്ചറിയുന്നുണ്ട്. തെരഞ്ഞെടുപ്പിലൂടെ അവര്‍ മറുപടി നല്‍കുമെന്നും അദ്ദേഹം കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: