ഭീമകാരനായ കപ്പലിന്റെ നിയന്ത്രണം നഷപ്പെട്ടു, സൂയസ് കനാലില്‍ വന്‍ ഗതാഗതക്കുരുക്ക്, നൂറോളം കപ്പലുകള്‍ കെട്ടിക്കിടക്കുന്നു

ഭീമാകാരനായ കണ്ടെയ്‌നര്‍ ഷിപ്പിന് നിയന്ത്രണം നഷ്ടമായതിനെ തുടര്‍ന്ന് ഈജിപ്തിലെ സൂയസ് കനാലില്‍ ഗതാഗതക്കുരുക്ക്. കണ്ടെയ്‌നര്‍ കപ്പലിന് നിയന്ത്രണം നഷ്ടമാവുകയും ഇതോടെ കപ്പല്‍ ഇവിടന്ന് നീക്കാനാവാതെ ഗതാഗതക്കുരുക്ക് രുപപ്പെടുകയുമായിരുന്നു.  

1312 അടി നീളവും 59 മീറ്റര്‍ വീതിയുമുള്ള കപ്പല്‍ സൂയസ് കനാലിന് കുറുകെ നിന്നതോടെയാണ് സമുദ്രപാത പൂര്‍ണമായും അടഞ്ഞത്. ചൊവ്വാഴ്ച രാവിലെ പ്രാദേശിക സമയം 7.40ഓടെയാണ് കപ്പല്‍ കനാലില്‍ കുടുങ്ങിയത്. പനാമയില്‍ രജിസ്റ്റര്‍ ചെയ്ത എവര്‍ ഗിവണ്‍ എന്ന കപ്പലാണ് ട്രാഫിക് ബ്ലോക്ക് ഉണ്ടാക്കിയത്. തായ്‌വാനിലെ ഒരു കമ്പനിയായ എവര്‍ ഗ്രീന്‍ മറൈനാണ് ഇതിലുള്ളത്. നെതര്‍ലാന്‍ഡിലെ റോട്ടര്‍ഡാമില്‍ നിന്ന് ചൈനയിലേക്ക് പുറപ്പെട്ടതായിരുന്നു ഈ കപ്പല്‍. സൂയസ് കനാലിന്റെ വടക്കന്‍ മേഖലയിലുള്ള തുറമുഖത്തിന് സമീപമായാണ് ചൊവ്വാഴ്ച സംഭവമുണ്ടായത്.

ടഗ് ബോട്ടുകള്‍ ഉപയോഗിച്ച് കപ്പലിനെ നീക്കാന്‍ ശ്രമിച്ചെങ്കിലും നടപടിയൊന്നുമായിട്ടില്ല. ഇത് കൂടാതെ കനാലിന്റെ ആഴം കൂട്ടി കപ്പലിനെ ഉയര്‍ത്താനും ശ്രമിക്കുന്നുണ്ട്. എന്നാല്‍ കപ്പല്‍ ഇവിടെ നിന്നും നീക്കാന്‍ ചിലപ്പോള്‍ ദിവസങ്ങളെടുക്കുമെന്നാണ് അന്താരാഷ്‌ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നത്. നൂറോളം കപ്പലുകളാണ് ഇതുമൂലം കെട്ടിക്കിടക്കുന്നത്.  

പെട്ടന്നുണ്ടായ കാറ്റില്‍ കപ്പലിന്റെ നിയന്ത്രണം നഷ്ടമാവുകയായിരുന്നു. തുടര്‍ന്ന് നിയന്ത്രണം നഷ്ടമായി ഒരു വശത്തേയ്‌ക്ക് ചെരിഞ്ഞതോടെ കപ്പലിന്റെ ഒരു വശം കനാലിന്റെ ഒരുഭാഗത്ത് ഇടിക്കുകയും ചെയ്തിട്ടുണ്ടെന്ന് അധികൃതര്‍ അറിയിച്ചു. എന്നാല്‍ ഈ ഗതാഗതക്കുരുക്ക് ആഗോള വ്യവസായ രംഗത്തില്‍ ചിലപ്പോള്‍ പ്രശ്‌നങ്ങള്‍ ഉണ്ടാക്കിയേക്കാമെന്നും വിദഗ്ധര്‍ അഭിപ്രായപ്പെട്ടിട്ടുണ്ട്  

സൂയസ് കനാലിന് കുറുകെ ചെരിയുന്ന ഏറ്റവും വലിയ കപ്പലാണ് എവര്‍ ഗിവണ്‍. കപ്പലിലെ ചരക്ക് ഇറക്കിയ ശേഷം മാത്രമാകും കപ്പലിനെ നീക്കാനാവുക. കപ്പല്‍ ഉറച്ചിരിക്കുന്ന കനാലിലെ മണലും നീക്കം ചെയ്യേണ്ടതുണ്ട്. ഇതിന് ദിവസങ്ങളോളം സമയം എടുക്കുമെന്നാണ് സൂയസ് കനാല്‍ അതോറിറ്റി വിലയിരുത്തുന്നത്. 2017ല്‍ ജാപ്പനില്‍ നിന്നുള്ള കണ്ടെയ്‌നര്‍ ഷിപ്പ് സാങ്കേതിക തകരാറ് മൂലം ഇടിച്ച് തിരിഞ്ഞ് നിന്ന് കനാലില്‍ ഗതാഗതക്കുരുക്ക് സൃഷ്ടിച്ചിരുന്നു. എന്നാല്‍ മണിക്കൂറുകളുടെ പ്രയത്‌ന ഫലമായി ഇത് നീക്കാന്‍ സാധിച്ചിരുന്നു.  

120 മൈല്‍ (193 കിലോമീറ്റര്‍) നീളമാണ് സൂയസ് കനാലിലുള്ളത്. മെഡിറ്ററേനിയനേയും ചെങ്കടലിനേയും ബന്ധിപ്പിക്കുന്ന ഈ സമുദ്രപാത ഏഷ്യയും യൂറോപ്പും തമ്മിലുള്ള ഏറ്റവും നീളം കുറഞ്ഞ സമുദ്രപാതയാണ് ഇത്. നൂറിലധികം കപ്പലുകളാണ് ഈ ട്രാഫിക്ക് ബ്ലോക്കില്‍ കുരുങ്ങിയിട്ടുള്ളത്. നൂറിലധികം കപ്പലുകളാണ് ഈ ട്രാഫിക്ക് ബ്ലോക്കില്‍ കുരുങ്ങിയിട്ടുള്ളത്.