ആലപ്പുഴ: മാവേലിക്കരയില്‍ കെ. സഞ്ജു എന്‍ഡിഎ സ്ഥാനാര്‍ത്ഥി. സിപിഎം ലോക്കല്‍ കമ്മിറ്റി അംഗമായിരുന്നു ഇന്നലെ ഉച്ചവരെ സഞ്ജു. പാര്‍ട്ടി കാട്ടുന്ന അവഗണനയില്‍ മനംനൊന്താണ് രഹസ്യമായി സഞ്ജു ബിജെപി നേതൃത്വവുമായി സംസാരിച്ചത്. പട്ടിക വന്നപ്പോള്‍ സഞ്ജുവിനെ തന്നെ മാവേലിക്കരയില്‍ എന്‍ഡിഎ സ്ഥാനാര്‍ഥിയാക്കി. ഇന്നലെ ഉച്ചവരെ സിപിഎം നേതാക്കള്‍ക്കൊപ്പമുണ്ടായിരുന്ന സഞ്ജു പാര്‍ട്ടി വിടുന്ന കാര്യം അടുത്ത സുഹൃത്തുക്കള്‍ക്കു പോലും അറിയില്ലായിരുന്നു.
ജില്ലയിലെ സിപിഎം നേതൃത്വത്തെ ഞെട്ടിച്ചാണ് മുന്‍ ജനപ്രതിനിധി വീണ്ടും എന്‍ഡിഎ സ്ഥാനാര്‍ഥിപ്പട്ടികയില്‍ ഇടംപിടിച്ചത്.. മാവേലിക്കരയിലെ ബിജെപി സ്ഥാനാര്‍ഥിയാകുന്ന കെ.സഞ്ജു സിപിഎം ലോക്കല്‍ കമ്മിറ്റി അംഗവും നേരത്തേ ഭരണിക്കാവ് ബ്ലോക്ക് പഞ്ചായത്തംഗവുമായിരുന്നു.
കഴിഞ്ഞ തദ്ദേശ തിരഞ്ഞെടുപ്പില്‍ ചുനക്കര പഞ്ചായത്തിലേക്കു മത്സരിച്ചു പരാജയപ്പെട്ടിരുന്നു. അതേസമയം, സഞ്ജുവിനെ സിപിഎം അംഗത്വത്തില്‍നിന്ന് പുറത്താക്കിയതായി സിപിഎം ചാരുംമൂട് ഏരിയ സെക്രട്ടറി ബി. ബിനു അറിയിച്ചിട്ടുണ്ട്. .
നേരത്തേ, ബിഡിജെഎസിന്റെ സ്ഥാനാര്‍ഥിപ്പട്ടികയില്‍ ചേര്‍ത്തലയിലെ എന്‍ഡിഎ സ്വതന്ത്രനായി സിപിഎം ലോക്കല്‍ കമ്മിറ്റി അംഗവും തണ്ണീര്‍മുക്കം പഞ്ചായത്ത് മുന്‍ പ്രസിഡന്റുമായ പി.എസ്. ജ്യോതിസ് ഇടംപിടിച്ചതും സിപിഎമ്മിനെ വെട്ടിലാക്കിയിരുന്നു.
പ്രതികരിക്കാൻ ഇവിടെ എഴുതുക: