വാഷിംഗ്ടണ്‍ ഡി.സി.: യു.എസ് പ്രതിരോധ സെക്രട്ടറി ജനറല്‍ ലോയ്ഡ് ജെ. ഓസ്റ്റിന്‍ മൂന്നു ദിവസത്തെ സന്ദർശനത്തിനായി ഇന്ത്യയിലെത്തും. മാര്‍ച്ച് 19ന് എത്തുന്ന അദ്ദേഹം പ്രതിരോധ മന്ത്രി രാജ്‌നാഥ് സിംഗ്, ഉയര്‍ന്ന ഉദ്യോഗസ്ഥര്‍ എന്നിവരുമായി ജനറല്‍ ലോയ്ഡ് ചര്‍ച്ച നടത്തും.
ബൈഡന്‍ ഭരണം ഏറ്റെടുത്തതിനുശേഷം ഇന്ത്യ സന്ദര്‍ശിക്കുന്ന ആദ്യ കാബിനറ്റ് അംഗമാണ് ഡിഫന്‍സ് സെക്രട്ടറി ജനറല്‍ ലോയ്ഡ് ജെ. ഓസ്റ്റിന്‍. അമേരിക്കയും ഇന്ത്യും തമ്മില്‍ പ്രതിരോധ സഹകരണം ശക്തിപ്പെടുത്തുക എന്നതാണ് സന്ദര്‍ശനോദ്യേശമെന്ന് ഡിഫന്‍സ് വക്താവ് അറിയിച്ചു. മാര്‍ച്ച് 12 ന് വെര്‍ച്ച്വലായി നടന്ന യു.എസ്., ആസ്‌ട്രേലിയ, ജപ്പാന്‍, ഇന്ത്യ എന്നിവര്‍ ഉള്‍പ്പെടുന്ന ഇന്തോ-പസഫിക്ക് സമ്മിറ്റിനുശേഷം നടക്കുന്ന സന്ദര്‍ശനമായതിനാല്‍ വളരെയധികം പ്രാധാന്യമാണ് ഇതിന് ലഭിക്കുക.
ഇന്ത്യ സന്ദര്‍ശനത്തിനു പുറമെ ജപ്പാന്‍ സൗത്ത് കൊറിയ രാജ്യങ്ങളിലും ജനറല്‍ ലോയ്ഡ് സന്ദര്‍ശനം നടത്തും. 2007നു ശേഷം യു.എസുമായി 18 ബില്യണ്‍ ഡോളറിന്റെ പ്രതിരോധ ഇടപാടുകളാണ് ഇന്ത്യ നടത്തിയിരിക്കുന്നത്. ഭാവിയില്‍ 3 ബില്യണ്‍ ഡോളറിന്റെ ആംഡ് ഡ്രോണ്‍സ്, വാങ്ങുന്നതിനുള്ള കരാറില്‍ ഇതിനകം തന്നെ ഇന്ത്യ ഒപ്പു വെച്ചിട്ടുണ്ട്. ബഹിരാകാശ ഭീഷിണിയെ നേരിടുന്നതിന് ഇന്ത്യയും യു.എസ്സും സഹകരിച്ചു പ്രവര്‍ത്തിക്കേണ്ടതുണ്ടെന്ന് കഴിഞ്ഞമാസം ബാംഗ്ലൂരില്‍ നടന്ന ഏയ്‌റോ ഇന്ത്യ ഷോയില്‍ യു.എസ്.ഡിഫന്‍സ് റിയര്‍ അഡ്മിറല്‍ ഇലീല്‍ ലോബച്ചര്‍ ആവശ്യപ്പെട്ടു.
ഇന്തോ പഫസിക്ക് മേഖലയില്‍ വര്‍ദ്ധിച്ചു വരുന്ന ചൈനയുടെ സ്വാധീനം ലോകരാഷ്‌ട്രങ്ങള്‍ക്ക് ഭീഷണിയാണെന്നും ഇലീന്‍ ചൂണ്ടികാട്ടിയിരുന്നു.
