സിപിഐക്കാരോട് ചെങ്കൊടി പിടിക്കരുതെന്ന് സിപിഎമ്മുകാര് ആക്രോശിച്ച് നടന്ന ഒരു കാലമുണ്ട്. കമ്മ്യൂണിസ്റ്റ് പാര്ട്ടി പിളര്ന്ന 64ന് ശേഷമാണ് കേരളത്തില് രണ്ടുകൂട്ടരും നിരത്തില് പോര്വിളിയുമായി നിരന്നത്. ”എമ്മെനും തൊമ്മനും കമ്മ്യൂണിസ്റ്റല്ല ചേലാട്ടച്ചു അല്ലേയല്ല ” എന്നിങ്ങനെ നീട്ടിപ്പാടി സിപിഐ നേതാക്കളായ എം.എന്. ഗോവിന്ദന് നായരെയും ടി.വി. തോമസിനെയും സി. അച്യുതമേനോനെയും മാര്ക്സിസ്റ്റുകള് വെല്ലുവിളിച്ചു.
‘വെക്കട വലതാ ചെങ്കൊടി താഴെ പൊക്കട വലതാ മൂവര്ണക്കൊടി’ എന്നായിരുന്നു ആക്രോശം. കോണ്ഗ്രസിന്റെ കൂടാരത്തില് ചെങ്കൊടി പണയം വെച്ചവരെന്ന് ആക്ഷേപം. കേരളത്തിന് പുറത്ത് രാഹുല്ഗാന്ധിയുടെ പടം വെച്ച് വോട്ട് പിടിക്കേണ്ട ഗതികേടിലെത്തിയ സിപിഎമ്മുകാര് 64ലെ ഈ പണയം വെയ്പിന്റെ കഥ ഇപ്പോളോര്ക്കുന്നുണ്ടോ ആവോ? സിപിഎമ്മിന്റെ ആക്ഷേപങ്ങള്ക്ക് സിപിഐ കൊടുത്ത മറുപടിയും ഹിറ്റാണ്.
”എംഎന്നിന്റേം ടി.വീടെം
എല്ലുതരാം ചോര തരാം
എല്ലിനെ ഞങ്ങള് വളമാക്കാം
എന്നാലെങ്കിലുമീയെമ്മെസിന്
ഇത്തിരി ബുദ്ധി ഉദിക്കട്ടെ”
ഭിന്നിപ്പിക്കലാണ് നമ്പൂതിരിയുടെ ജീവിതമന്ത്രമെന്ന മുദ്രാവാക്യത്തിലെ ആക്ഷേപത്തിന് കേരളത്തിന്റെ രാഷ്ട്രീയചരിത്രമാണ് സിപിഐക്കാര് അനുഭവപാഠമാക്കുന്നത്. ശങ്കരബസു ബാലാനന്ദന് കള്ളക്കമ്പനി കറക്കുകമ്പനി എന്ന് ആക്ഷേപിക്കുക മാത്രമല്ല, ”പ്രത്യയശാസ്ത്രക്കഴുതകളേ വാ വാ ഞങ്ങടെ കൂടെ” എന്ന് സിപിഎമ്മുകാരെ ക്ഷണിക്കാനും അവര് മറന്നില്ല.
ചേലാട്ടച്ചുവും എമ്മനും തൊമ്മനും കൂടി കോണ്ഗ്രസിന്റെ അടുക്കളയില് മേശ തുടയ്ക്കുകയും ചട്ടി വടിക്കുകയുമാണെന്നായിരുന്നു സിപിഎമ്മിന്റെ മറുപടി.
പിന്കുറി: എന്തായാലും മാറിയ രാഷ്ട്രീയസാഹചര്യത്തില് രണ്ട് ചെങ്കൊടിക്കാരും മൂവര്ണക്കൊടി പൊക്കുന്നതാവും നല്ലത്.
