പാലക്കാട്: രാഷ്ട്രീയത്തിലെ കുടുംബാധിപത്യം അവസാനിപ്പിക്കണമെന്നാവശ്യപ്പെട്ട് മന്ത്രി എ.ക. ബാലനെതിരെ പോസ്റ്ററുകള്. പാലക്കാട് നഗരത്തിലാണ് ഇത്തരത്തിലുള്ള പോസ്റ്ററുകള് പ്രത്യക്ഷപ്പെട്ടിരിക്കുന്നത്. സേവ് കമ്യൂണിസം എന്ന പേരിലുള്ള പോസ്റ്ററുകള് മന്ത്രിയുടെ വീടിന് സമീപവും സിപിഎം ജില്ലാ കമ്മിറ്റി ഓഫീസിന് മുന്നിലും പതിച്ചിട്ടുണ്ട്.
പാര്ട്ടി അധികാരം വെച്ച് മണ്ഡലത്തെ കുടുംബ സ്വത്താക്കാന് നോക്കിയാല് നട്ടെല്ലുള്ള കമ്യൂണിസ്റ്റുകാര് തിരിച്ചടിക്കും. ജനാധിപത്യത്തെ കുടുംബ സ്വത്താക്കാനുള്ള അധികാര മോഹികളെ തിരിച്ചറിയുകയെന്നും അധികാരമില്ലെങ്കില് ജീവിക്കാനാവില്ലെന്ന ചില നേതാക്കളുടെ അടിച്ചേല്പ്പിക്കല് തുടര് ഭരണം ഇല്ലാതാക്കുമെന്നും സേവ് കമ്യൂണിസത്തിന്റെ പോസ്റ്ററില് വിമര്ശനമുണ്ട്.
മന്ത്രി ബാലന്റെ പേര് പരാമര്ശിക്കാതെയാണ് പോസ്റ്റര് പതിപ്പിച്ചിരിക്കുന്നത്. തരൂരില് ഡോക്ടര് ജമീല സ്ഥാനാര്ത്ഥിയാവുന്നതിനെതിരെ പ്രവര്ത്തകര്ക്കിടയില് അമര്ഷം ഉണ്ടായിരുന്നു.
ഇന്ന് പാലക്കാട് സിപിഎം ജില്ലാ നേതൃയോഗങ്ങള് ചേരാനിരിക്കേയാണ് മന്ത്രിക്കെതിരെ പോസ്റ്ററുകള് പ്രത്യക്ഷപ്പെട്ടിരിക്കുന്നത്. യോഗത്തില് എ.കെ.ബാലന്റെ ഭാര്യ ജമീലക്ക് സീറ്റ് നല്കുന്നത് സംബന്ധിച്ചും ചര്ച്ച ചെയ്യും. പി.കെ.ശശിക്ക് സീറ്റ് നിഷേധിച്ചതും ഇന്ന് ചര്ച്ച ചെയ്യുമെന്നാണ് പ്രതീക്ഷിക്കുന്നത്.
