തിരുവനന്തപുരം: മെഡിക്കല് കോളേജ് ഡോക്ടര്മാരുടെ അലവന്സ് പരിഷ്കരണംഅടക്കമുള്ള ശമ്പളകുടിശ്ശിക നല്കാത്തതിലും എന്ട്രി കേഡര്, കരിയര് അഡ്വാന്സ്മെന്റ് പ്രൊമോഷന്റെ കാലയളവ് അടക്കമുള്ള അപാകതകള് പരിഹരിക്കാത്തത്, എന്നിവയിലും പ്രതിഷേധിച്ചു സംസ്ഥാനത്തെ എല്ലാ മെഡിക്കല് കോളേജ് ഡോക്ടര്മാരും വഞ്ചന ദിനം സംഘടിപ്പിച്ചു
എല്ലാ മെഡിക്കല് കോളേജിലും പ്രിന്സിപ്പല് ഓഫീസിനു മുന്നിലും തിരുവനന്തപുരത്തു ഡി എം ഇ ഓഫീസിനു മുന്നിലും പ്രതിഷേധജാഥയും, ധര്ണയും നടത്തി. രോഗി പരിചരണത്തെയും, അധ്യാപനത്തെയും ബാധിച്ചില്ല. കോവിഡ് പ്രോട്ടോകോള് പാലിച്ചു.
തിരുവനന്തപുരം ഡി എം ഇ ഓഫീസിനു മുന്നില് പ്രതിഷേധ ധര്ണ കെജിഎംസിടിഎ സംസ്ഥാനപ്രസിഡന്റ് ഡോ ബിനോയ് എസ് ഉല്ഘാടനം ചെയ്തു. സംസ്ഥാന സെക്രട്ടറി ഡോ നിര്മ്മല് ഭാസ്കര് അധ്യക്ഷത വഹിച്ചു. യൂണിറ്റ് പ്രസിഡന്റ് ഡോ ശ്രീകുമാര് ആര് സി, ഡോ ശ്രീനാഥ്, ഡോ ഷീല, ഡോ ദിലീപ്, ഡോ രാജ് എന്നിവര് പ്രസംഗിച്ചു.
ഡോക്ടര്മാര് ചട്ടപ്പടി സമരം അനിശ്ചിതകാലം നടത്തും. ഈ കാലയളവില് വി ഐ പി ഡ്യൂട്ടി, പേ വാര്ഡ് ഡ്യൂട്ടി, നോണ് കോവിഡ് -നോണ് എമര്ജന്സി മീറ്റിംഗുകള് എന്നിവ ബഹിഷ്കരിക്കും. അധികജോലികള് ബഹിഷ്കരിക്കും. രോഗികളുമായൊ അധ്യാപനവുമായൊ ബന്ധമില്ലാത്ത എല്ലാ ജോലികളും ബഹിഷ്കരിക്കും.
എല്ലാ ദിവസവും സംസ്ഥാനത്തെ മെഡിക്കല് കോളേജ് ഡോക്ടര്മാര് കരിദിനം ആചരിക്കുകയും, രോഗികള്ക്കും പൊതുജനങ്ങള്ക്കും വിശദീകരണകുറിപ്പ് നല്കുകയും ചെയ്യും.
കേരളത്തിലെ കോവിഡ് വ്യാപനം തടയാന് കഠിന പ്രയത്നം നടത്തിയ സംസ്ഥാനത്തെ മെഡിക്കല് കോളേജ് ഡോക്ടര്മാര്ക്ക് അര്ഹതപ്പെട്ട ശമ്പള കുടിശ്ശിക നല്കാത്തതിനെതിരെ ഗവണ്മെന്റ് മെഡിക്കല് കോളേജുകളിലെ ഡോക്ടര്മാര് വിവിധ പ്രതിഷേധപരിപാടികള് നടത്തി.
സര്ക്കാര് മെഡിക്കല് കോളേജുകളിലെ ഡോക്ടര്മാര്ക്ക് 2016 ല് ലഭിക്കേണ്ട ശമ്പളപരിഷ്കരണം 2020 വരെ നീണ്ടു പോയി.ഈ കാലയളവില് കിട്ടേണ്ട അലവന്സുകള് അടക്കമുള്ള ശമ്പള കുടിശ്ശിക ലഭിച്ചില്ല. ശമ്പളപരിഷ്കരണത്തിന്റെ പേ സ്ലിപ് ഇതുവരെ ഇറങ്ങിയിട്ടില്ല.
