കോട്ടയം: സാംസ്‌കാരികരംഗത്തെ ജീര്‍ണ്ണതകള്‍ക്കെതിരെ തപസ്യ ശക്തമായി പ്രതികരിക്കണമെന്ന് പ്രശസ്ത വാദ്യകലാകാരന്‍ ഡോ. പ്രകാശന്‍ പഴമ്പാലക്കോട്. തപസ്യ കലാസാഹിത്യ വേദി ജില്ലാ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
ദേശീയതയെയും പാരമ്പര്യത്തനിമകളെയും നിന്ദിക്കുകയും എതിരഭിപ്രായം പ്രകടിപ്പിക്കുകയും ചെയ്യുന്നത് അംഗീകാരത്തിനുള്ള യോഗ്യതയായി മാറുന്ന സാഹചര്യമാണുള്ളത്. ഭരണചക്രം തിരിക്കുന്നവരുടെ പിന്തുണയും ഇക്കൂട്ടര്‍ക്ക് കേരളത്തില്‍ ലഭിക്കുന്നു. ഇതിന്റെ ഫലം സാംസ്‌കാരിക ജീര്‍ണ്ണതയും അപചയവുമാണ്. ഇതിനെ എതിര്‍ത്തു തോല്‍പ്പിക്കാന്‍ തപസ്യയ്‌ക്കു കഴിയണം. മലയാള ഭാഷാപിതാവിന്റെ പ്രതിമ സ്ഥാപിക്കാന്‍ നമുക്ക് അവകാശമുണ്ട്. രാഷട്രീയ കക്ഷികള്‍ക്ക് ഇതില്‍ താല്പര്യമില്ല. കലാസാഹിത്യ രംഗത്തുള്ള മറ്റൊരു പ്രസ്ഥാനങ്ങളും ഇക്കാര്യത്തില്‍ മുന്നോട്ടു വരാനും തയ്യാറല്ല. മതത്തിന്റെ പുകമറ സൃഷ്ടിക്കുകയാണ് ഒരു വിഭാഗം. ഭാഷാപിതാവ് ഒരു മതത്തിന്റെയും വക്താവല്ല. അതുകൊണ്ട് എഴുത്തച്ഛന്റെ പ്രതിമ സ്ഥാപിക്കാന്‍ നാം തന്നെ മുന്നിട്ടിറങ്ങണമെന്നും അദ്ദേഹം കൂട്ടിച്ചേര്‍ത്തു.
ജില്ലാ വര്‍ക്കിംഗ് പ്രസിഡന്റ് എന്‍. ശ്രീനിവാസന്‍ അദ്ധ്യക്ഷനായി. സംസ്ഥാന വര്‍ക്കിംഗ് പ്രസിഡന്റ് പ്രൊഫ. പി.ജി. ഹരിദാസ് മുഖ്യ പ്രഭാഷണം നടത്തി. സംഗീത സംവിധായകനും തപസ്യമേഖലാ പ്രസിഡന്റുമായ ആലപ്പി രംഗനാഥന്‍ മാസ്റ്ററെ ഡോ. പ്രകാശന്‍ പഴമ്പാലക്കോട് പൊന്നാട അണിയിച്ച് ആദരിച്ചു. സംഗീതജ്ഞ ലക്ഷ്മി ശര്‍മ്മ കുമാരനല്ലൂര്‍, ആര്‍എല്‍വി കോളേജില്‍ നിന്ന് വയലിനില്‍ രണ്ടാം റാങ്ക് നേടിയ ജയദേവ് വിജയന്‍ കുമ്മനം, ഐഎടിഎയില്‍ ദേശീയ തലത്തില്‍ ഒന്നാം റാങ്ക് നേടിയ അലീന സുരേഷ് എന്നിവരെ പ്രൊഫ.പി.ജി. ഹരിദാസ് ആദരിച്ചു.
ജനറല്‍ സെക്രട്ടറി രാജു ടി. പത്മനാഭന്‍ റിപ്പോര്‍ട്ട് അവതരിപ്പിച്ചു. സംസ്ഥാന സെക്രട്ടറി പി.ജി. ഗോപാലകൃഷ്ണന്‍ ജില്ലാ, താലൂക്ക് ഭാരവാഹികളെ പ്രഖ്യാപിച്ചു. മേഖലാ വൈസ് പ്രസിഡന്റ് പി.എന്‍. ബാലകൃഷ്ണന്‍, കുടമാളൂര്‍ രാധാകൃഷ്ണന്‍, വി.ജി. ജയദേവ്, ബിബിരാജ് നന്ദിനി, പി.കെ. ശ്രീധരന്‍, പി.കെ. ജയപ്രകാശ്, പൊതിയില്‍ നാരായണ ചാക്യാര്‍, സുരേന്ദ്രകമ്മത്ത്, ഡോ. രാജേഷ് കടമാന്‍ചിറ തുടങ്ങിയവര്‍ സംസാരിച്ചു.
പ്രതികരിക്കാൻ ഇവിടെ എഴുതുക: