കൊച്ചി : താരസംഘടനയായ അമ്മയ്ക്ക് ഇനിമുതല് സ്വന്തം ആസ്ഥാന മന്ദിരം. എറണാകുളം കലൂരിലുള്ള കെട്ടിടത്തിന്റെ ഉദ്ഘാടനം മമ്മൂട്ടിയും മോഹന്ലാലും ചേര്ന്ന് നിര്വഹിച്ചു. കോവിഡ് മാനദണ്ഡങ്ങളെല്ലാം പാലിച്ചുകൊണ്ടാണ് കെട്ടിടത്തിന്റെ ഉദ്ഘാടന ചടങ്ങ് നടത്തിയത്.
എല്ലാവിധ അത്യാധുനിക സംവിധാനങ്ങളോടുകൂടി പത്ത് കോടി രൂപ ചെലവിട്ടാണ് കെട്ടിടം നിര്മിച്ചിരിക്കുന്നത്. ഇതു വെറുമൊരു സംഘടനയല്ല കുടുംബമാണ്. ഏറ്റവും വലിയ കര്മ്മത്തിന് നമ്മള് സാക്ഷിയാകുകയാണ്. ഇവിടെ വന്നവര്ക്ക് അതിനുള്ള ഭാഗ്യമുണ്ടായി. വരാത്തവര് എപ്പോഴെങ്കിലും വീഡിയോയിലൂടെ കാണട്ടെ. ഇതിന്റെ പിറകില് ഒരുപാട് പേര് പ്രവര്ത്തിച്ചു. രാവെന്നും പകലെന്നും ഇല്ലാതെ ഇതിന്റെ പിറകില് പ്രവര്ത്തിച്ച ഇടവേള ബാബു, സിദ്ദിഖ്, ബാബു രാജ് തുടങ്ങിയവരോട് നന്ദി പറയുന്നു.
എക്സിക്യൂട്ടീവ് കമ്മിറ്റിയിലെ എല്ലാവരെയും ഈ സന്ദര്ഭത്തില് ഓര്ക്കുന്നു. അമ്മ സംഘടനയ്ക്ക് വേണ്ടി നമ്മള് വളരെക്കാലം മുന്പ് ഒരു സിനിമ ചെയ്തിരുന്നു. അതുപോലെ ഒരു സിനിമ കൂടി ചെയ്യുന്നു. അതിനായുള്ള തയ്യാറെടുപ്പിലാണ്. അതിന്റെ വിവരങ്ങള് കുറച്ച് സസ്പെന്സാണെന്നും ഉദ്ഘാടന പ്രസംഗത്തില് മോഹന്ലാല് അറിയിച്ചു.
വളരെ സന്തോഷകരമായ കാര്യമാണ്. എല്ലാവരെയും ഒരിക്കല് കൂടി കാണാന് സാധിച്ചതില് വളരെ സന്തോഷമുണ്ട്. കെട്ടിടം നിര്മിക്കുന്നതിനായി മുന്കൈ എടുക്കുകയും അതിനുവേണ്ടി പ്രയത്നിക്കുകയും ചെയ്തവരെ അഭിനന്ദിക്കുന്നതായി മമ്മൂട്ടിയും അറിയിച്ചു.
