ന്യൂഡല്‍ഹി: ലൈംഗിക പീഡനത്തിന്റെ നിര്‍വചനവുമായി ബന്ധപ്പെട്ട ബോംബെ ഹൈക്കോടതിയുടെ വിവാദ ഉത്തരവ് സുപ്രീംകോടതി സ്റ്റേ ചെയ്തു. പോക്സോ ആക്ട് പ്രകാരം ശരീരഭാഗങ്ങള്‍ പരസ്പരം (സ്‌കിന്‍ ടു സ്‌കിന്‍ കോണ്ടാക്ട്) ചേരാതെ ഒരു പെണ്‍കുട്ടിയുടെ മാറിടത്തില്‍ സ്പര്‍ശിക്കുന്നതിനെ ലൈംഗിക പീഡനമായി കാണാനാകില്ലെന്ന ഉത്തരവിനാണ് സ്റ്റേ. മൂന്ന് വനിതാ അഭിഭാഷകര്‍ നല്‍കിയ ഹര്‍ജിയാണ് ചീഫ് ജസ്റ്റിസ് എസ്.എ. ബോബ്‌ഡെ അധ്യക്ഷനായ ബെഞ്ച് പരിഗണിച്ചത്.
അറ്റോര്‍ണി ജനറല്‍ കെ കെ വേണുഗോപാല്‍ കോടതിയില്‍ ഹര്‍ജിയെ പിന്തുണച്ചു. നാഗ്പുര്‍ ബെഞ്ച് ജസ്റ്റിസ് പുഷ്പ ഗനേഡിവാലയുടെ ഉത്തരവ് അപകടരമായ കീഴ്‍വഴക്കം ഉണ്ടാക്കുമെന്നാണ് അദ്ദേഹം കോടതിയെ അറിയിച്ചത്. സതീഷ് എന്ന വ്യക്തി 2016 ഡിസംബറില്‍ പെണ്‍കുട്ടിയെ പീഡിപ്പിച്ചെന്ന പരാതിയിലാണ്, പീഡനമായി കണക്കാക്കണമെങ്കില്‍ ലൈംഗിക ഉദ്ദേശത്തോടെ ചര്‍മവും ചര്‍മവും ചേര്‍ന്നുള്ള സ്പര്‍ശനം ആവശ്യമാണെന്ന് ഹൈക്കോടതി ഉത്തരവില്‍ വ്യക്തമാക്കിയത്.
പേരയ്‌ക്ക നല്‍കാമെന്നു പറഞ്ഞ് നാഗ്പുരിലെ വീട്ടിലേക്ക് പെണ്‍കുട്ടിയെ വിളിച്ചുവരുത്തി പീഡിപ്പിച്ചുവെന്നാണ് പരാതി. മാറിടത്തില്‍ സ്പര്‍ശിക്കുകയും വസ്ത്രം മാറ്റാന്‍ ശ്രമിക്കുകയും ചെയ്തുവെന്നുമായിരുന്നു പരാതി. എന്നാല്‍ മേല്‍വസ്ത്രം മാറ്റാതെയാണ് മാറിടത്തില്‍ സ്പര്‍ശിച്ചത് എന്നതിനാല്‍ ലൈംഗിക ആക്രമണമായി കണക്കാക്കാനാകില്ലെന്നു വിവാദ ഉത്തരവില്‍ കോടതി നിരീക്ഷിച്ചു. പെണ്‍കുട്ടിയുടെ അന്തസ്സിനെ ലംഘിച്ചതിനു ഐപിസി 354 വകുപ്പ് പ്രകാരം കേസെടുക്കാമെന്നും ഹൈക്കോടതി വ്യക്തമാക്കിയിരുന്നു.
പ്രതികരിക്കാൻ ഇവിടെ എഴുതുക: