പത്തനാപുരം: കിണറ്റില് വീണ പൂച്ചയെ പുറത്തെടുക്കാനിറങ്ങി ബോധരഹിതനായ വയോധികനെ രക്ഷിക്കാന് ഇറങ്ങിയ യുവാവിന് ദാരുണാന്ത്യം. പുനലൂര് വെഞ്ചേമ്പ് അയനിക്കോട് അനീഷ് ഭവനില് അനീഷ് (35) ആണ് മരണപ്പെട്ടത്. ഇന്നലെ വൈകിട്ട് ആറ് മണിയോടെ പിറവന്തൂര് തച്ചക്കുളം രേഖാ മന്ദിരത്തില് രത്നാകരന്റെ വീട്ടിലായിരുന്നു സംഭവം.
ബുധനാഴ്ച വൈകിട്ട് കിണറ്റില് വീണ പൂച്ചയെ പുറത്തെടുക്കാന് പ്രദേശവാസിയായ കൊച്ചു ചെറുക്കന് (78) ആണ് ആദ്യം കിണറ്റിലിറങ്ങുന്നത്. ശ്വാസം മുട്ടി ഇയാള് ബോധരഹിതനായതിനെ തുടര്ന്ന് ഇയാളെ രക്ഷിക്കാനായി രാധാകൃഷ്ണന് എന്നയാള് ഇറങ്ങി. ഇയാള്ക്കും അസ്വസ്ഥത അനുഭവപ്പെട്ടതിനെ തുടര്ന്നാണ് അനീഷ് ഇരുവരേയും രക്ഷിക്കാനായി കിണറ്റില് ഇറങ്ങിയത്. കൊച്ചു ചെറുക്കനെയും രാധാകൃഷ്ണനെയും നാട്ടുകാരുടെ സഹായത്തോടെ പുറത്തെത്തിച്ച ശേഷം കരയിലേക്ക് കയറാനുള്ള ശ്രമത്തിനിടെ അനീഷ് ബോധരഹിതനായി കിണറ്റിലേക്ക് വീഴുകയായിരുന്നു.
അഗ്നിശമന സേനയെത്തി പുനലൂര് താലൂക്ക് ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. പുനലൂര് വെഞ്ചേമ്പ് സ്വദേശിയായ അനീഷ് പിറവന്തൂരിലെ ഭാര്യവീട്ടില് എത്തിയതായിരുന്നു. കെട്ടിട നിര്മ്മാണ തൊഴിലാളിയായിരുന്നു അനീഷ്. പുനലൂര് താലൂക്ക് ആശുപത്രി മോര്ച്ചറിയില് സൂക്ഷിച്ചിട്ടുള്ള മൃതദേഹം പോസ്റ്റുമോര്ട്ടത്തിന് ശേഷം ഇന്ന് ബന്ധുക്കള്ക്ക് വിട്ടുനല്കും. ഭാര്യ: രാജിത. മകള്: ആരതി.
