മുംബൈ: മുപ്പത്തിയേഴ് പന്തില് നൂറ് റണ്സ്, ഈ മലയാളി താരത്തിന്റേത് ആശ്ചര്യപ്പെടുത്തുന്ന ബാറ്റിങ്… സയ്യിദ് മുഷ്താഖ് അലി ട്വന്റി20 ക്രിക്കറ്റില് അതിശയിപ്പിക്കുന്ന ബാറ്റിങ്ങുമായി സെഞ്ചുറി നേടിയ കേരളത്തിന്റെ മുഹമ്മദ് അസ്ഹറുദ്ദീനെ പരാമര്ശിച്ച് ബിസിസിഐ തൊട്ടു പിന്നാലെ ട്വിറ്ററില് പങ്കുവച്ച് ട്വീറ്റാണിത്. ചുരുക്കി പറഞ്ഞാല് ഒറ്റ രാത്രി കൊണ്ട് ബിസിസിഐയുടെ പോലും ശ്രദ്ധ പിടിച്ചു പറ്റാന് മുഹമ്മദ് അസ്ഹറുദ്ദീനെന്ന മലയാളിക്ക് സാധിച്ചു.
കരുത്തരായ മുംബൈക്കെതിരെ ഓപ്പണറായി ബാറ്റിങ്ങിനിറങ്ങിയ അസ്ഹര് അടിച്ചെടുത്തത് 54 പന്തില് 137 റണ്സ്. 9 ഫോറും 11 സിക്സുകളും അസ്ഹറിന്റെ ബാറ്റിന്റെ പ്രഹരശേഷി തുറന്നുകാട്ടുന്നു. മുംബൈ ഉയര്ത്തിയ കൂറ്റന് വിജയലക്ഷ്യം അസ്ഹറിന്റെ അനായാസ ബാറ്റിങ്ങിലാണ് കേരളം മറികടന്നത്. മലയാളി താരത്തിന്റെ വെടിക്കെട്ട് ബാറ്റിങ്ങിനെ മുന് താരങ്ങളടക്കം പല പ്രമുഖരും പ്രശംസിച്ച് രംഗത്തെത്തി. മുംബൈയുടെ ധവാല് കുല്ക്കര്ണിയടക്കമുള്ള ദേശീയ ശ്രദ്ധ നേടിയ ബൗളര്മാരെ അസ്ഹര് തല്ലി തകര്ത്തപ്പോള് ഒരുപിടി റെക്കോഡുകളും വഴിമാറി.
ആഭ്യന്തര ക്രിക്കറ്റിലെ വേഗമേറിയ മൂന്നാമത്തെ സെഞ്ചുറിയാണിത്. സയ്യിദ് മുഷ്താഖ് അലി ടൂര്ണമെന്റില് വേഗമേറിയ രണ്ടാമത്തെയും. ടൂര്ണമെന്റില് ഒരിന്നിങ്സില് ഏറ്റവും കൂടുതല് സിക്സുകള് നേടുന്ന താരവുമായി അസ്ഹര്. ക്രിക്കറ്റ് ആരാധകരെ ഞെട്ടിച്ച അസ്ഹറിനെ മണിക്കൂറുകള്ക്കിപ്പുറം കെസിഎ തിരിച്ചും ഞെട്ടിച്ചു. ഒരു റണ്ണിന് 1000 രൂപ വീതം പാരിതോഷികം പ്രഖ്യാപിച്ച കെസിഎ അസ്ഹറിന് ആകെ നല്കിയത് 1,37,000 രൂപ.
ഓപ്പണറായി തകര്ത്തടിച്ച അസ്ഹറിനെ പ്രശംസിച്ച് ഇന്ത്യയുടെ വെടിക്കെട്ട് ബാറ്റ്സ്മാന് വീരേന്ദര് സെവാഗ് ഉള്പ്പെടെയുള്ളവര് രംഗത്തെത്തി. ഈ രീതിയില് ബാറ്റ് ചെയ്യുകയെന്നത് ചില്ലറ കാര്യമല്ല, മികച്ച രീതിയില് സ്വയം കളി അവസാനിപ്പിക്കുകയും ചെയ്തിരിക്കുന്നു. തികച്ചും ആസ്വദിക്കാവുന്ന ഇന്നിങ്സ്…. ഇതായിരുന്നു സെവാഗിന്റെ ട്വീറ്റ്. പ്രമുഖരുടെ ശ്രദ്ധിയില്പ്പെട്ടതോടെ തുടങ്ങാനിരിക്കുന്ന ഐപിഎല്ലില് ഉള്പ്പെടെ അസ്ഹറിന്റെ പേര് കോടികളുടെ കണക്കില് ഉയര്ന്നു കേള്ക്കുമെന്നാണ് വിലയിരുത്തല്.
