തിരുവനന്തപും: വാളയാര്‍ കേസില്‍ പ്രായപൂര്‍ത്തിയാകാത്ത പെണ്‍കുട്ടികള്‍ പീഡനത്തിനിരയായി മരിച്ച സംഭവത്തില്‍ പൊലീസിന് വീഴ്ച പറ്റിയെന്ന് ജുഡീഷ്യല്‍ കമ്മീഷന്‍ റിപ്പോര്‍ട്ട്.
കേസന്വേഷിച്ച സംസ്ഥാന ന്യൂനപക്ഷ കമ്മിഷന്‍ അധ്യക്ഷന്‍ കൂടിയായ പി.കെ. ഹനീഫയാണ് റിപ്പോര്‍ട്ട് നല്‍കിയത്. ജുഡീഷ്യല്‍ കമ്മിഷന്‍ റിപ്പോര്‍ട്ടിന്മേല്‍ സര്‍ക്കാര്‍ സ്വീകരിച്ച നടപടി സംബന്ധിച്ച് ആക്ഷന്‍ ടേക്കന്‍ റിപ്പോര്‍ട്ട് സഭയില്‍ വെച്ചു. കേസില്‍ പ്രോസിക്യൂഷനും വീഴ്ചവരുത്തിയെന്ന് റിപ്പോര്‍ട്ടില്‍ പറയുന്നു.
കഴിഞ്ഞ വര്‍ഷം ഏപ്രിലില്‍ സര്‍ക്കാരിന് സമര്‍പ്പിച്ച റിപ്പോര്‍ട്ടിന്റെ ഉള്ളടക്കം ഇതുവരെ രഹസ്യമാക്കി വെച്ചിരിക്കുകയായിരുന്നു. ഈ റിപ്പോര്‍ട്ടിന്മേല്‍ സര്‍ക്കാര്‍ സ്വീകരിച്ച നടപടികളെക്കുറിച്ചുള്ള പ്രസ്താവനയാണ് ബുധനാഴ്ച സഭയില്‍ വെച്ചത്. റിപ്പോര്‍ട്ടിന്റെ അടിസ്ഥാനത്തില്‍ എസ് ഐ പി.സി. ചാക്കോയെ അന്വേഷണചുമതലയില്‍ നിന്ന് ഒഴിവാക്കി.
