തൃശൂര്‍: ടി.എന്‍ പ്രതാപന്‍ എം.പിയും ഡിസിസി പ്രസിഡന്റ് എം.പി വിന്‍സെന്റും കോണ്‍ഗ്രസ്സ് വോട്ട് മൊത്തക്കച്ചവടം ചെയ്ത് ജീവിക്കുന്നവരാണെന്ന് ബിജെപി ജില്ലാ പ്രസിഡന്റ് അഡ്വ.കെ.കെ അനീഷ്‌കുമാര്‍. ജനങ്ങള്‍ വോട്ട് ചെയ്ത് ഒന്നാമതാക്കിയ ബിജെപിയെ തോല്‍പിക്കാന്‍ സിപിഎം സ്ഥാനാര്‍ത്ഥിയ്‌ക്ക് ആവണിശ്ശേരിയില്‍ വോട്ട് ചെയ്തത് ഈ കച്ചവടത്തിന്റെ ഭാഗമാണെന്നും അനീഷ് കുമാര്‍ പറഞ്ഞു. കോണ്‍ഗ്രസ്സിന് വോട്ടും സീറ്റും കുറഞ്ഞത് ഇവര്‍ വോട്ട് വിറ്റതു കൊണ്ടാണ്.
കേരളത്തില്‍ സിപിഎമ്മുമായി ധാരണയില്ലെന്ന് കെപിസിസി നേതൃത്വം ആവര്‍ത്തിക്കുമ്പോഴാണ് ജില്ലയില്‍ പരസ്യമായ വോട്ട് മറിക്കല്‍ അരങ്ങേറുന്നത്. ജനവിധി അട്ടിമറിച്ച കോണ്‍ഗ്രസ്സിന്റെ നെറികെട്ട രാഷ്‌ട്രീയത്തിനെതിരെ ജില്ലാ വ്യാപകമായി പ്രചരണം നടത്തുമെന്നും അനീഷ്‌കുമാര്‍ അറിയിച്ചു. ജില്ലയിലെ കോണ്‍ഗ്രസ്സ് നേതാക്കള്‍ സിപിഎമ്മുമായി രഹസ്യധാരണയിലാണ്. ഈ നേതാക്കള്‍ വോട്ട് മറിച്ചതാണ് ജില്ലയില്‍ കോണ്‍ഗ്രസ് തകര്‍ന്നടിയാന്‍ കാരണം.
സ്വന്തം സ്ഥാനാര്‍ത്ഥിയെ നിര്‍ത്തി കാല് വാരി തോല്‍പിച്ച നേതാക്കള്‍ക്കെതിരെ അണികളില്‍ വ്യാപകമായ അമര്‍ഷമുണ്ട്. സിപിഎമ്മിനെ നേരിടാന്‍ ആര്‍ജ്ജവമില്ലാത്ത കോണ്‍ഗ്രസ്സ് നേതാക്കളുടെ നിലപാടില്‍ പ്രതിഷേധിച്ച് നിരവധിയാളുകള്‍ വരും ദിനങ്ങളില്‍ ബിജെപിയിലെത്തുമെന്നും അനീഷ്‌കുമാര്‍ അറിയിച്ചു.
പ്രതികരിക്കാൻ ഇവിടെ എഴുതുക: