തിരുച്ചിറപ്പളളി: തമിഴ്നാട്ടിൽ മലയാളി യുവാവിനെ ജനക്കൂട്ടം മർദ്ദിച്ച് കൊലപ്പെടുത്തി. തിരുച്ചിറപ്പള്ളിയിലെ അല്ലൂരാണ് സംഭവം. തിരുവനന്തപുരം മലയിൻകീഴ് സ്വദേശി ദീപു ആണ് മരിച്ചതെന്ന് പോലീസ് അറിയിച്ചു. ഇയാളുടെ ഒപ്പമുണ്ടായിരുന്ന മലയാളി അരവിന്ദനെയും ജനക്കൂട്ടം ആക്രമിച്ചു. ഇയാളെ കസ്റ്റഡിയിലെടുത്തെന്നും മോഷണ ശ്രമത്തിനിടെയാണ് ജനക്കൂട്ടം ഇവരെ മർദ്ദിച്ചതെന്നുമാണ് പോലീസ് നൽകുന്ന വിവരം.
ഇന്നലെയായിരുന്നു സംഭവത്തിന്റെ തുടക്കം. വീട് കുത്തിതുറന്ന് മോഷ്ടിക്കാൻ ശ്രമിച്ചുവെന്നാണ് ആരോപണം. ആക്രമണത്തിൽ പരിക്കേറ്റ ഇരുവരെയും പോലീസ് എത്തിയാണ് ആശുപത്രിയിലേക്ക് മാറ്റിയത്. മഹാത്മാഗാന്ധി മെമ്മോറൽ ആശുപത്രിയിൽ പ്രവേശിപ്പിച്ച ദീപു മരിക്കുകയായിരുന്നു. ചികിത്സയിലുള്ള അരവിന്ദിന്റെ ആരോഗ്യനിലയിൽ പ്രശ്നങ്ങളില്ലെന്ന് ആശുപത്രി അധികൃതർ അറിയിച്ചു.
ഇവർ മോഷണം നടത്തിയോയെന്ന് പോലീസ് സ്ഥിരീകരിച്ചിട്ടില്ല. പോലീസ് കേസെടുത്തിട്ടില്ലെങ്കിലും സംഭവവുമായി ബന്ധപ്പെട്ട് ചിലരെ കസ്റ്റഡിയിൽ എടുത്തിട്ടുണ്ട്. ഇവർ എന്തിനാണ് തിരുച്ചിറപ്പള്ളിയിൽ എത്തിയതെന്ന കാര്യത്തിലും പോലീസ് വിശദീകരണം നൽകിയിട്ടില്ല.
