ഇടുക്കി: ഒരുഗ്രാമം പൂര്‍ണ്ണമായും പുറം ലോകവുമായി ഒറ്റപ്പെട്ട് കഴിയുമ്പോഴും ഇതൊന്നും കാണാതെ അധികൃതര്‍. കണ്ടിട്ടും കാണാത്ത ഭാവം നടിക്കുന്നതാണെന്ന പരാതിയുമായി നാട്ടുകാരും. മലയിഞ്ചിക്ക് സമീപത്തെ ചേലകാടും വില്ലന്‍ തണ്ടും ചേരുന്ന പ്രദേശത്ത് താമസിക്കുന്നവരാണ് പുറം ലോകവുമായി ബന്ധപ്പെടാന്‍ യാതൊരു സൗകര്യവുമില്ലാതെ യാത്രാ ദുരിതത്തില്‍ വലയുന്നത്.
വനവാസി ഭൂരിപക്ഷ മേഖലയായിട്ടും റോഡ് പണിയാന്‍ നടപടിയില്ല. വില്ലന്‍ തണ്ടുകാര്‍ റോഡിന് വേണ്ടി കാത്തിരിക്കാന്‍ തുടങ്ങിയിട്ട് പതിറ്റാണ്ടുകളായി എന്നാല്‍ റോഡെന്ന ആശയം പോലും അധികൃതരുടെ മനസ്സില്‍ തോന്നിയിട്ടില്ലെന്ന് നാട്ടുകാര്‍ പരാതിപ്പെടുന്നു.
ചേലകാട് നിന്ന് വില്ലന്‍തണ്ട് വഴി ഉപ്പുകുന്ന് മേലെ സിറ്റിയില്‍ എത്താനുള്ള ഏഴ് കിലോമീറ്റര്‍ റോഡാണ് പണിയേണ്ടത്. വില്ലന്‍തണ്ട് മലയുടെ ഇരുവശവും റോഡ് എത്തിനില്‍ക്കുന്ന് രണ്ടര കിലോമീറ്റര്‍ റോഡുകൂടി വെട്ടിത്തുറന്നാല്‍ ഈ റോഡുകള്‍ കൂടിച്ചേരും. 1995ല്‍ പി.ടി. തോമസ് എംഎല്‍എ ആയിരുന്ന കാലത്ത് മലയിഞ്ചി ചേലകാട് വില്ലന്‍ തണ്ട് വഴി ഉപ്പുകുന്നിനുള്ള റോഡ് പണിയുന്നതിന് നടത്തിയ ശ്രമം വനം വകുപ്പിന്റെ എതിര്‍പ്പ് മൂലം തസ്സപ്പെട്ടിരുന്നു. തുടര്‍ന്ന് ഇതുവരെ റോഡ് വെട്ടിത്തുറക്കുന്നതിനുള്ള നടപടിയുണ്ടായിട്ടില്ല. 400ലേറെ കുടുംബങ്ങള്‍ക്കാണ് ഈ റോഡ് പണി പൂര്‍ത്തിയായാല്‍ പ്രയോജനപ്പെടുക.
യാത്ര സൗകര്യ മില്ലാത്തതിനാല്‍ പലരും ഇവിടെ നിന്ന് വാടകയ്‌ക്കും മറ്റും മാറിത്താമസിക്കുകയാണ്. അതിനാല്‍ അള്‍ത്താമസം കുറവാണ്. ഇപ്പോള്‍ ഇവിടെ താമസിക്കുന്നവര്‍ക്കെങ്ങാന്‍ രോഗമുണ്ടായാല്‍ രോഗികളെ ആശുപത്രിയില്‍ എത്തിക്കണമെങ്കില്‍ രണ്ട് കിലോമീറ്റര്‍ ചുമക്കണം വാഹനം എത്തുന്ന റോഡില്‍ വരെ എത്താന്‍. വിദ്യാര്‍ത്ഥികള്‍ക്ക് സ്‌കൂളില്‍ പോകണമെങ്കില്‍ കാല്‍നടയാത്ര ശരണം.
ഒരിക്കല്‍ അധികൃതര്‍ കണ്ണ് തുറക്കുമെന്നും തടസങ്ങള്‍ നീങ്ങി റോഡ് പണിയുമെന്നാണ് നാട്ടുകാരുടെ പ്രതീക്ഷ. യാത്ര സൗകര്യ മില്ലാത്തതിനാല്‍ മാറി താമസിക്കേണ്ടി വന്ന സാഹചര്യം മാറി തങ്ങളുടെ കൃഷിയിടങ്ങളിലേക്കും വീടുകളിലേക്കും തിരികെ എത്തി ജീവിതം കരുപ്പിടിപ്പിക്കാന്‍ കഴിയുമെന്ന പ്രതീക്ഷയിലാണ് വില്ലന്‍തണ്ടുകാര്‍.
പ്രതികരിക്കാൻ ഇവിടെ എഴുതുക: