നിലമ്പൂരിൽ അക്കൗണ്ട് തുറന്ന് ബിജെപി, വടക്കൻ കേരളത്തിൽ ചരിത്രം സൃഷ്ടിച്ച് എൻഡിഎ മുന്നേറ്റം

മലപ്പുറം: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന്റെ വോട്ടെണ്ണൽ പുരോഗമിക്കെ ആദ്യ ഫല സൂചനകൾ ബിജെപിക്ക് അനുകൂലം. നിലമ്പൂർ നഗരസഭയിൽ അക്കൗണ്ട് തുറന്ന് ബിജെപി. നിലമ്പൂർ രണ്ടാം വാർഡിലാണ് എൻഡിഎ സ്ഥാനാർത്ഥി വിജയനാരായണൻ വിജയിച്ചത്.

വടക്കൻ കേരളത്തിൽ ആദ്യ ഫല സൂചനകൾ പുറത്തുവരുമ്പോൾ എൻഡിഎ വലിയ മുന്നേറ്റമാണ് കാഴ്‌ച്ചവയ്‌ക്കുന്നത്. താനൂരിൽ രണ്ടിടത്തും മലപ്പുറം കോട്ടയ്‌ക്കലിലും ബിജെപിക്ക് ജയം.

തളിപ്പറമ്പ് മുനിസിപ്പാലിറ്റിയിൽ മൂന്ന് സീറ്റുകൾ നേടി ബിജെപി ചരിത്രം സൃഷ്ടിച്ചു. കോടതി മൊട്ട , പാൽക്കുളങ്ങര , തൃച്ചംബരം എന്നീ വാർഡുകളിലാണ് ബിജെപി വിജയിച്ചത്. കഴിഞ്ഞ പ്രാവശ്യം ബിജെപിക്ക് ഒരു സീറ്റ് മാത്രമാണ് ലഭിച്ചത്.

കോൺഗ്രസിന്റെ സിറ്റിംഗ് സീറ്റുകളാണ് ബിജെപി പിടിച്ചെടുത്തത്. കോടതി മൊട്ടയിൽ ബിജെപി സ്ഥാനാർത്ഥി സുജാത 306 വോട്ടിന്റെ ഭൂരിപക്ഷത്തിലാണ് വിജയിച്ചത്. പാൽക്കുളങ്ങരയിൽ വത്സരാജൻ 32 വോട്ടുകളുടെ ഭൂരിപക്ഷത്തിലും തൃച്ചംബരത്ത് പി.വി സുരേഷ് 118 വോട്ടുകളുടെ ഭൂരിപക്ഷത്തിലുമാണ് വിജയിച്ചത്.