ന്യൂദല്ഹി: ബിജെപി ദേശീയ അധ്യക്ഷന് ജെ.പി. നദ്ദയ്ക്ക് നേരേയുണ്ടായ ആക്രമണത്തിന്റെ പശ്ചാത്തലത്തില് പശ്ചിമ ബംഗാള് ചീഫ് സെക്രട്ടറിയോടും പോലീസ് മേധാവിയോടും നേരിട്ടു ഹാജരാകാന് കേന്ദ്ര ആഭ്യന്തര മന്ത്രാലയം നിര്ദേശിച്ചു. പശ്ചിമ ബംഗാളില് ക്രമസമാധാന നില തകരാറിലാണെന്ന് ഗവര്ണര് ജഗ്ദീപ് ധന്ഖര് റിപ്പോര്ട്ട് നല്കിയതിനു പിന്നാലെയാണ് കേന്ദ്ര സര്ക്കാരിന്റെ നടപടി. 14ന് നേരിട്ടെത്തി സംഭവത്തില് വിശദീകരണം നല്കാനാണ് നിര്ദേശം.
പശ്ചിമ ബംഗാളിലെ ക്രമസമാധാന നിലയെക്കുറിച്ചും രാഷ്ട്രീയ അക്രമങ്ങളും മറ്റ് കുറ്റകൃത്യങ്ങളും തടയുന്നതിന് സ്വീകരിച്ച നടപടികളെക്കുറിച്ചുമാണ് ചീഫ് സെക്രട്ടറിയോടും പോലീസ് മേധാവിയോടും വിശദീകരണം ആവശ്യപ്പെട്ടിരിക്കുന്നതെന്ന് ഒരു ഉദ്യോഗസ്ഥന് പറഞ്ഞു. നദ്ദയ്ക്കെതിരെ സര്ക്കാര് സ്പോണ്സേര്ഡ് അക്രമമായിട്ടാണ് കേന്ദ്ര ആഭ്യന്തര മന്ത്രാലയം വിലയിരുത്തുന്നത്. രാജ്യം ഭരിക്കുന്ന പാര്ട്ടിയുടെ ദേശീയ നേതാക്കളെത്തുമ്പോള് നല്കേണ്ട സുരക്ഷാ പ്രോട്ടോകോളുകള് സ്വീകരിച്ചില്ലെന്നും ചൂണ്ടിക്കാണിക്കപ്പെടുന്നു. അതേസമയം ചീഫ് സെക്രട്ടറിയേയും ഡിജിപിയേയും ദല്ഹിയിലേക്ക് അയയ്ക്കില്ലെന്ന നിലപാടിലാണ് മുഖ്യമന്ത്രി മമത ബാനര്ജി.
ജന്മഭൂമി ഓണ്ലൈന്