തിരുവനന്തപുരം : ബാര്‍ ഉടമകളില്‍ നിന്നായി 27.79 കോടി രൂപ പിരിച്ചിരുന്നതായി വിജിലന്‍സ് കണ്ടെത്തിയതായി വെളിപ്പെടുത്തല്‍. പണം പിരിച്ചില്ലെന്ന് ഫെഡറേഷന്‍ ഓഫ് കേരള ഹോട്ടല്‍ അസോസിയേഷന്‍ പ്രസിഡന്റ് വി. സുനില്‍കുമാറിന്റെ വാദം തള്ളിക്കൊണ്ട് ബിജു രമേശ് തന്നെയാണ് ഈ വെളിപ്പെടുത്തല്‍ നടത്തിയിരിക്കുന്നത്.
കെപിസിസി പ്രസിഡന്റായിരിക്കേ രമേശ് ചെന്നിത്തലയ്‌ക്ക് കോഴ നല്‍കിയതായി അടുത്തിടെ ബിജു രമേശ് വെളിപ്പെടുത്തിയിരുന്നു. ബാര്‍ ഉടമകളില്‍ നിന്ന് പണം പിരിച്ചു നല്‍കി എന്നായിരുന്നു വെളിപ്പെടുത്തല്‍. ഇതിന് പിന്നാലെ സുനില്‍ കുമാര്‍ രംഗത്ത് എത്തുകയും പണം പിരിച്ചു നല്‍കിയിട്ടില്ലെന്ന് അറിയിക്കുകയുമായിരുന്നു. എന്നാല്‍ ആ സമയത്ത് സുനില്‍കുമാര്‍ ഭാരവാഹിത്വത്തില്‍ ഇല്ലെന്നും അന്നത്തെ ഭാരവാഹികള്‍ താന്‍ പറഞ്ഞത് നിഷേധിച്ചിട്ടില്ലെന്നും ബിജു രമേശ് സ്വകാര്യ മാധ്യമത്തോട് വെളിപ്പെടുത്തി.
മുന്‍ മന്ത്രി കെ. ബാബുവിന് എതിരായി തെളിവില്ലെന്ന് പറയുന്ന വിജിലന്‍സ് റിപ്പോര്‍ട്ടില്‍ തന്നെ ബാര്‍ അസോസിയേഷന്‍ പണം പിരിച്ചെന്ന് കണ്ടെത്തിയിരുന്നു. അത്രയും പണം ഇപ്പോള്‍ എവിടെയെന്നും അദ്ദേഹം ചോദിച്ചു. പണം പിരിച്ചിട്ടില്ലെന്ന സുനില്‍ കുമാറിന്റെ വെളിപ്പെടുത്തലോടെ അദ്ദേഹത്തിന് വ്യക്തിപരമായ നേട്ടങ്ങള്‍ ഉണ്ടായിട്ടുണ്ടെന്നും ബിജു രമേശ് കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: