ശാസ്താംകോട്ട: മാസങ്ങള്ക്ക് മുമ്പ് ബിജെപിയില് ചേര്ന്ന സിപിഎം പഞ്ചായത്തംഗമായ യുവതിയെ സിപിഎം മുന് അംഗത്തിന്റെ നേതൃത്വത്തില് വഴിയില് തടഞ്ഞു നിര്ത്തി മര്ദ്ദിച്ചു.
മണ്ട്രോത്തുരുത്തിലെ മുന് സിപിഎം അംഗം ബി. അനുപമയാണ് ബിജെപിയില് ചേര്ന്നതിന്റെ പേരില് പട്ടാപ്പകല് നടുറോഡില് ആക്രമിക്കപ്പെട്ടത്. ഇന്നലെ വൈകിട്ട് മൂന്നിന് മണ്ട്രോതുരുത്ത് വില്ലേജ് ഓഫീസിന് സമീപമായിരുന്നു സംഭവം. ബിജെപി പഞ്ചായത്ത് സെക്രട്ടറി അജിയുടെ ബൈക്കിന് പിന്നിലിരുന്ന് വരികയായിരുന്ന അനുപമയെ പിന്തുടര്ന്നെത്തിയ സിപിഎം നേതാവ് അരവിന്ദാക്ഷന്പിള്ളയും മുന് സിപിഎം അംഗം സരളാമണിയും ചേര്ന്ന് ആക്രമിക്കുകയായിരുന്നു.
ക്രൂര മര്ദ്ദനത്തിന് ഇരയായ അനുപമയെ റോഡില് തള്ളിയ ശേഷം സംഘം കടന്നുകളഞ്ഞു. പരിക്കേറ്റ അനുപമ ആശുപത്രിയില് ചികിത്സയിലാണ്. ഒന്നരമാസം മുമ്പാണ് മണ്ട്രോതുരുത്ത് പഞ്ചായത്തിലെ സിപിഎം അംഗമായിരുന്ന അനുപമ പാര്ട്ടി നേതൃത്തിനെതിരെ പരസ്യമായി രംഗത്തുവന്നത്. തുടര്ന്ന് അവര് ബിജെപി സംസ്ഥാന പ്രസിഡന്റ് കെ. സുരേന്ദ്രന്റെ കൈയില് നിന്നും പാര്ട്ടി അംഗത്വം സ്വീകരിച്ചു.
വില്ലിമംഗലം അഞ്ചാം വാര്ഡിലെ ജനപ്രതിനിധിയായിരുന്ന അനുപമ ഇക്കുറി ബിജെപി സ്ഥാനാര്ഥിയായി ഏഴാം വാര്ഡില് മത്സരിക്കാന് ഇന്നലെ പത്രിക നല്കിയിരുന്നു. സിപിഎമ്മില് നിന്നും രാജിവച്ച് ബിജെപി അംഗമായ അന്നു മുതല് അനുപമയ്ക്ക് നേരെ മാര്ക്സിസ്റ്റുകാര് ഭീഷണിയുമായി രംഗത്തു വന്നിരുന്നു. തുടര്ന്നാണ് ഇന്നലെ ക്രൂര മര്ദ്ദനത്തിന് ഇരയായത്.
