പത്തനംതിട്ട : കെ.പി. യോഹന്നാന്റെ ബിലീവേഴ്സ് ചര്ച്ചിന്റെ കീഴിലുള്ള വിവിധ സ്ഥാപനങ്ങളില് നടത്തിയ തെരച്ചിലില് ആദായ നികുതി വകുപ്പ് 15 കോടി രൂപ പിടികൂടി. ബിലീവേഴ്സ് ചര്ച്ചിന്റെ തിരുവല്ല മെഡിക്കല് കോളേജ് കോംപൗണ്ടിലെ കാറില് നിന്നും ദല്ഹിയിലേയും കേരളത്തിലേയും വിവിധ സ്ഥാപനങ്ങളില് നിന്നുമായാണ് 15 കോടി പിടികൂടിയിരിക്കുന്നത്.
ഇത് കൂടാത രണ്ട് കോടിയുടെ നിരോധിച്ച നോട്ടുകെട്ടുകള് കൂടി പിടികൂടിയിട്ടുണ്ട്. തിരുവല്ലയിലെ ബിലീവേഴ്സ് ചര്ച്ച് അസ്ഥാനത്തു നിന്നാണ് നിരോധിച്ച നൂറിന്റേയും, അഞ്ഞൂറിന്റേയും നോട്ടുകള് പിടികൂടിയിരിക്കുന്നത്. തെരച്ചില് ഇപ്പോഴും തുടര്ന്നുകൊണ്ടിരിക്കുകയാണ്. വിദേശ സംഭാവന നിയന്ത്രണ ചട്ടവും (എഫ്സിആര്എ) വിദേശനാണ്യ വിനിമയ നിയന്ത്രണ ചട്ടവും (ഫെറ) ലംഘിച്ച് കഴിഞ്ഞ അഞ്ചുവര്ഷത്തിനിടെ ബിലീവേഴ്സ് ചര്ച്ചിന് വിദേശത്തുനിന്നും 6000 കോടി രൂപയാണ് ലഭിച്ചത്.
ജീവകാരുണ്യ പ്രവര്ത്തനത്തിന്റെ പേരില് 30ലേറെ ട്രസ്റ്റുകള് രൂപീകരിച്ച് സംസ്ഥാനത്തെ 60 കേന്ദ്രങ്ങളിലേക്കായാണ് ബിലീവേഴ്സ് ഗ്രൂപ്പ് വിദേശ സഹായം സ്വീകരിച്ചിട്ടുള്ളത്. ഗോസ്പല് ഫോര് ഏഷ്യ എന്ന പേരിലാണ് ബിലീവേഴ്സ് ചര്ച്ച് ആഗോളതലത്തില് അറിയപ്പെടുന്നത്. കെ.പി യോഹന്നാന് എതിരെ നേരത്തെ തന്നെ വ്യാപകമായി ആരോപണങ്ങളും പരാതികളും ഉയര്ന്നിരുന്നു. 2012 ല് കെ.പി യോഹന്നാന് എതിരെ സംസ്ഥാന സര്ക്കാര് അന്വേഷണം പ്രഖ്യാപിക്കുകയും ചെയ്തിരുന്നു.
2005-ല് 2223 ഏക്കര് വരുന്ന ചെറുവള്ളി എസ്റ്റേറ്റ് വാങ്ങിയിരുന്നു. സഭയ്ക്കുകീഴില് ലാസ്റ്റ് ഔവര് മിനിസ്ട്രി, ലവ് ഇന്ത്യ മിനിസ്ട്രി, അയന ചാരിറ്റബിള് ട്രസ്റ്റ്, ബിലീവേഴ്സ് ഈസ്റ്റേണ് ചര്ച്ച് ഓഫ് ഇന്ത്യ എന്നീ ചാരിറ്റബിള് ട്രസ്റ്റുകളാണ് ചര്ച്ചിന്റെതായി ഉള്ളത്. ഇതിന് പുറമെ തിരുവല്ല മെഡിക്കല് കോളജ് ആശുപത്രി, ആത്മീയ യാത്ര ടെലിവിഷന് ചാനല്, തിരുവല്ല, തൃശൂര് എന്നിവിടങ്ങളില് റെസിഡന്ഷ്യല് സ്കൂള് എന്നിവയും ബിലീവേഴ്സ് ചര്ച്ചിനുണ്ട്.
അടുത്ത കാലത്ത് പ്രവര്ത്തനം ആരംഭിച്ച വാര്ത്താചാനലിന്റെ വലിയ ഓഹരികളും വാങ്ങിയിട്ടുണ്ടെന്നും കണ്ടെത്തിയിട്ടുണ്ട്. 1990 മുതല് 2011 വരെ 48 രാജ്യങ്ങളില് നിന്നായി രണ്ടു ട്രസ്റ്റുകള്ക്കുമായി 1544 കോടി രൂപ ലഭിച്ചതായി നേരത്തെ കണ്ടെത്തിയിരുന്നു. ഈ പണം ഉപയോഗിച്ച് 19,000 ഏക്കര് ഭൂമി വാങ്ങിക്കൂട്ടിയതായും സംസ്ഥാനത്തിനകത്തും പുറത്തും വിദ്യാഭ്യാസ സ്ഥാപനങ്ങള്, കെട്ടിടസമുച്ചയങ്ങള് എന്നിവ വാങ്ങിയതായും കണ്ടെത്തിയിരുന്നു.
സംസ്ഥാനത്ത് ബിലീവേഴ്സ് ചര്ച്ചിന് 10,000 ഏക്കര് ഭൂമിയുണ്ടെന്നാണ് കണക്കാക്കുന്നത്. ഗോസ്പല് ഫോര് ഏഷ്യക്ക് 7,000 ഏക്കര് ഭൂമിയുമുണ്ടെന്നും റിപ്പോര്ട്ടുകള് ഉണ്ട്. ഗോസ്പല് ഫോര് ഏഷ്യ ട്രസ്റ്റിനു മാത്രം 1991 മുതല് 2008 വരെ 572,06,00,587 രൂപയുടെ വിദേശ ഫണ്ട് ലഭിച്ചിട്ടുണ്ടെന്നും 2002 മുതല് 2008 വരെ ബിലീവേഴ്സ് ചര്ച്ചിന് 472,02,71,753 രൂപയും വിദേശത്തുനിന്ന് ലഭിച്ചിട്ടുണ്ടെന്നും അന്ന് കണക്കുകള് പുറത്തുവന്നിരുന്നു.
