രാഘവ ലോറന്‍സ് സംവിധാനം ചെയ്ത് വിജയിപ്പിച്ച തമിഴ് ചിത്രം കാഞ്ചനയുടെ ഹിന്ദി റിമേയ്‌ക്ക് ലക്ഷ്മി ബോംബിന്റെ അദ്യ ഗാനം റിലീസ് ചെയ്തു. അക്ഷയ് കുമാര്‍ നായകനാകുന്ന സിനിമ ലോറന്‍സ് തന്നെയാണ് ഹിന്ദിയിലും സംവിധാനം ചെയ്തിരിക്കുന്നത്. കിയാര അദ്വാനിയാണ് നായിക.
ദീപാവലി ചിത്രമായി നവംബര്‍ ഒന്‍പതിന് ഡിസ്നി പ്ലസ് ഹോട്ട്സ്റ്റാറിലൂടെ റിലീസ് ചെയ്യും. ഒടിടി റിലീസിനോടൊപ്പം തന്നെ ന്യൂസിലാന്‍ഡ്, ഓസ്‌ട്രേലിയ, യുഎഇ എന്നിവിടങ്ങളിലെ തിയറ്ററുകളില്‍ ചിത്രം റിലീസ് ചെയ്യും. അക്ഷയ് കുമാറിനൊപ്പം കിയാര അദ്വാനിയും ചുവടുവെയ്‌ക്കുന്ന ‘ബുര്‍ജ് ഖലീഫ’ എന്ന പാട്ടാണ് ഇപ്പോള്‍ റിലീസ് ചെയ്തിരിക്കുന്നത്. ഗാനം പുറത്തിറങ്ങി മണിക്കൂറുകള്‍ക്കകം ലക്ഷക്കണക്കിന് കാഴ്ചക്കാരെ ആകര്‍ഷിച്ചു കഴിഞ്ഞു. വിവിധ വിദേശ രാജ്യങ്ങളില്‍ അവിടുത്തെ നയന മനോഹാരിതയുടെ പശ്ചാത്തലത്തിലാണ് ഈ ഗാനം ചിത്രീകരിച്ചിട്ടുള്ളത് എന്നതാണ് സവിശേഷത.
അക്ഷയ് കുമാറിന്റെ കേപ് ഓഫ് ഗുഡ് ഫിലിംസ്, ഷബീന ഖാന്‍, തുഷാര്‍ കപൂര്‍, ഫോക്‌സ് സ്റ്റാര്‍ സ്റ്റുഡിയോസ് എന്നിവര്‍ ചേര്‍ന്നാണ് നിര്‍മാണം നടത്തുന്നത്. തുഷാര്‍ കപൂര്‍, മുസ്ഖാന്‍ ഖുബ്ചന്ദാനി, ഷരദ് കേല്‍ക്കര്‍, തരുണ്‍ അറോറ, അശ്വിനി കല്‍സേക്കര്‍ തുടങ്ങിയ നിരവധി പ്രമുഖരും ചിത്രത്തില്‍ വേഷമിടുന്നുണ്ട്.
നര്‍മ്മവും ഭയവും പ്രതികാരവും കോര്‍ത്തിണക്കി പുറത്തു വിട്ട ‘ലക്ഷ്മി ബോംബി’ന്റെ ട്രെയ്ലര്‍ യൂട്യൂബില്‍ ഏതാനും ദിവസം മുമ്പ് പുറത്തിറങ്ങിയിരുന്നു. സമൂഹ മാധ്യമങ്ങളില്‍ ഇത് വൈറലാവുകയും ചെയ്തിരുന്നു.
പ്രതികരിക്കാൻ ഇവിടെ എഴുതുക: