തിരുവനന്തപുരം: കേരളത്തിലെ ആരോഗ്യമേഖല തകര്ന്നടിഞ്ഞെന്നും കൊവിഡ് പ്രതിരോധത്തിന് കേന്ദ്രസഹായം തേടണമെന്നും ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന് പ്രസ്താവനയില് പറഞ്ഞു. പ്രതിരോധ പ്രവര്ത്തനത്തില് കേരളത്തിന്റെ അലംഭാവം വിനയായെന്ന കേന്ദ്ര ആരോഗ്യമന്ത്രിയുടെ പ്രസ്താവന സംസ്ഥാന സര്ക്കാരിന് മുഖമടച്ചേറ്റ പ്രഹരമാണ്.
പി.ആര് ഏജന്സിയെ ഉപയോഗിച്ച് വ്യാജപ്രചാരണം നടത്തുന്നതിനിടെ മുന്നൊരുക്കം നടത്തുന്നതില് സംസ്ഥാനം പരാജയപ്പെട്ടു. കൊവിഡ് പ്രതിരോധപ്രവര്ത്തനം നടത്തുന്ന തദ്ദേശസ്ഥാപനങ്ങള്ക്ക് വേണ്ട ഫണ്ട് സര്ക്കാര് അനുവദിക്കുന്നില്ല.വികസനപ്രവര്ത്തനത്തിന് ഉപയോഗിക്കേണ്ട പണം ഉപയോഗിച്ചാണ് തദ്ദേശ സ്ഥാപനങ്ങള് ഇപ്പോള് പ്രതിരോധ പ്രവര്ത്തനം നടത്തുന്നത്. സര്ക്കാര് ആശുപത്രികളില് സൗകര്യം ഇല്ലാത്തതിനാല് ഹോംഐസൊലേഷനെയും സ്വകാര്യ ആശുപത്രികളെയുമാണ് പൊതുജനം ആശ്രയിക്കുന്നത്.
ടെസ്റ്റുകളുടെ എണ്ണത്തില് മറ്റു സംസ്ഥാനങ്ങളെ അപേക്ഷിച്ച് ഏറെ പിറകിലായതാണ് കേരളത്തില് സ്ഥിതി ഇത്രയും ഭയാനകമാക്കിയതെന്ന് സുരേന്ദ്രന് ചൂണ്ടിക്കാട്ടി. മുംബൈ,ഡല്ഹി ഉള്പ്പെടെയുള്ള കൊവിഡ് വ്യാപനം രൂക്ഷമായ സ്ഥലങ്ങളില് കൂടുതല് ടെസ്റ്റുകള് നടത്തിയും കേന്ദ്ര സഹായം സ്വീകരിച്ചുമാണ് സര്ക്കാറുകള് രോഗത്തെ പിടിച്ചുകെട്ടിയത്.
എന്നാല് കേരളത്തില് ടെസ്റ്റുകളുടെ എണ്ണം പ്രതിദിനം കുറയുകയാണ്. പൊസിറ്റീവായ രോഗികള് ദിവസങ്ങള് കഴിഞ്ഞാണ് രോഗവിവരം അറിയുന്നത്. അത്യാസന്ന നിലയിലുള്ള രോഗികള്ക്ക് പോലും ആംബുലന്സ് സൗകര്യം ലഭിക്കുന്നില്ല. ഐസൊലേഷനില് കഴിയുന്നവരോട് ഫോണില് പോലും രോഗവിവരം തിരക്കാന് ആരോഗ്യപ്രവര്ത്തകരില്ല.
കഴിഞ്ഞ ദിവസം പാലക്കാട് കൊവിഡ് ബാധിച്ച് മരിച്ച രോഗികളുടെ മൃതദ്ദേഹം മാറി മറവ് ചെയ്ത സംഭവം രാജ്യത്തിന് തന്നെ നാണക്കേടാണ്. ലോക്ക്ഡൗണ് സമയത്ത് മറ്റുസംസ്ഥാനങ്ങള് കൊവിഡ് കെയര്സെന്ററുകളും അനുബന്ധ സൗകര്യങ്ങളും ഒരുക്കിയപ്പോള് കേരളത്തില് സര്ക്കാര് മുഖ്യമന്ത്രിയുടേയും ആരോഗ്യമന്ത്രിയുടെ വായ്ത്താരി പാടുകയായിരുന്നുവെന്നും സുരേന്ദ്രന് കുറ്റപ്പെടുത്തി.
