ശാസ്താംകോട്ട: ഉറ്റവര്‍ കൈയൊഴിഞ്ഞ എച്ച്ഐവി ബാധിതനെ പത്തനാപുരം ഗാന്ധിഭവന്‍ ഏറ്റെടുത്തു. കായംകുളം കറ്റാനം സ്വദേശിയായ അറുപത്തിനാലുകാരനെയാണ് ഇയാള്‍ ചികിത്സയില്‍ കഴിഞ്ഞിരുന്ന ശാസ്താംകോട്ട താലൂക്ക് ആശുപത്രിയില്‍ നിന്നും ഗാന്ധിഭവന്‍ അധികൃതരെത്തി ഏറ്റെടുത്തത്.
വിവാഹിതനായിരുന്ന ഇദ്ദേഹം കുടുംബത്തെ ഉപേക്ഷിച്ച് ചെറുപ്പകാലത്തുതന്നെ നാടുവിട്ടതാണ്. കുറെക്കാലം സൗദി അറേബ്യയില്‍ ജോലിചെയ്തു. പ്രമേഹരോഗബാധിതനായി ജോലി ചെയ്യാനാകാതെ വന്നപ്പോള്‍ ചില സന്നദ്ധസംഘടനകളുടെ സഹായത്തോടെ നാട്ടിലെത്തി. തുടര്‍ന്ന് പലയിടങ്ങളിലായി അലഞ്ഞു.
പലവിധ രോഗങ്ങള്‍ക്കൊപ്പം പ്രമേഹവും മൂര്‍ച്ഛിച്ചപ്പോള്‍ ഇയാളുടെ വലതുകാല്‍ മുറിച്ചുമാറ്റി. പരിശോധനയില്‍ എച്ച്ഐവി ബാധിതനാണെന്നും കണ്ടെത്തി. തുടര്‍ന്ന് കഴിഞ്ഞ ഏഴുമാസക്കാലമായി ശാസ്താംകോട്ട താലൂക്ക് ആശുപത്രിയിലെ ഡോക്ടര്‍മാരുടെയും ജീവനക്കാരുടെയും പരിചരണത്തില്‍ കഴിഞ്ഞുവരികയായിരുന്നു.ഇദ്ദേഹത്തിന്റെ തുടര്‍സംരക്ഷണത്തിനായി ആശുപത്രി സൂപ്രണ്ട് ഡോ. ഷഹന കെ. മുഹമ്മദ് ആവശ്യപ്പെട്ടതനുസരിച്ച് കോവൂര്‍ കുഞ്ഞുമോന്‍ എംഎല്‍എ ഗാന്ധിഭവന്‍ സെക്രട്ടറി പണ്ടുനലൂര്‍ സോമരാജനെ വിവരം അറിയിക്കുകയുമായിരുന്നു.
തുടര്‍ന്ന് ഗാന്ധിഭവന്‍ വൈസ് ചെയര്‍മാന്‍ പണ്ടി.എസ്. അമല്‍രാജിന്റെ നേതൃത്വത്തില്‍ പ്രവര്‍ത്തകര്‍ ആശുപത്രിയിലെത്തി എംഎല്‍എ, ആശുപത്രി സൂപ്രണ്ട്, ബ്ലോക്ക് പഞ്ചായത്ത് പ്രസിഡന്റ് ബി. അരുണാമണി, പഞ്ചായത്ത് പ്രസിഡന്റ് ഐ. നൗഷാദ്, മെമ്പര്‍ എസ്. ദിലീപ് കുമാര്‍, സാമൂഹ്യപ്രവര്‍ത്തകരായ അഡ്വ. രാജീവ് രാജധാനി, ഷാജഹാന്‍ രാജധാനി തുടങ്ങിയവരുടെ സാന്നിദ്ധ്യത്തില്‍ ഇയാളെ ഏറ്റെടുത്ത് ഗാന്ധിഭവനിലേക്ക് കൊണ്ടുവന്നു.
