മുംബൈ: സമൂഹമാധ്യമങ്ങളിലെ ചര്ച്ചകള്ക്ക് അവസാനമിട്ട് താന് ക്യാന്സര് രോഗിയാണെന്ന് സമ്മതിച്ച് ബോളിവുഡ് താരം സഞ്ജയ് ദത്ത്. സഞ്ജയ് ദത്തിന് ആരോഗ്യപ്രശ്നമുണ്ടെന്നും ക്യാന്സര് രോഗത്തിന് ചികിത്സയിലാണെന്നും കഴിഞ്ഞ മാസങ്ങളില് വാര്ത്തകള് വന്നിരുന്നു. എന്നാല്, അദ്ദേഹത്തിന്റെ കുടുംബാംഗങ്ങളാരും ഇക്കാര്യം സമ്മതിക്കുകയോ നിഷേധിക്കുകയോ ചെയ്തില്ല. ആരോഗ്യ പ്രശ്നമുണ്ടെന്നും ചികിത്സയിലാണെന്നും ഭാര്യ മാന്യത ദത്ത് പറഞ്ഞിരുന്നു. സിനിമയില് നിന്ന് ചെറിയ ഇടവേളയെടുക്കുകയാണെന്ന് സഞ്ജയ് ദത്തും വ്യക്തമാക്കിയിരുന്നു.
പലപ്പോഴും ആശുപത്രിയിലേക്ക് പോകുന്ന താരത്തിന്റെ ദൃശ്യങ്ങള് സമൂഹമാധ്യമങ്ങളില് ചര്ച്ചയായിരുന്നു. താന് ക്യാന്സറിനോട് പടവെട്ടുകയാണെന്നും ഉടനെ തിരിച്ചുവരുമെന്നും സഞ്ജയ് ദത്ത് ഇന്നലെ പറഞ്ഞു. ആരാധകര് ആവേശത്തോടെ കാത്തിരിക്കുന്ന കെജിഎഫിന്റെ രണ്ടാം ഭാഗത്തിനുള്ള തയാറെടുപ്പിനിടെയാണ് താരം അസുഖബാധിതനായത്.
നേരത്തെ ആഗസ്റ്റില് ശ്വാസതടസം നേരിട്ടതിനെ തുടര്ന്ന് സഞ്ജയ് കൊറോണ പരിശോധനയ്ക്ക് വിധേയനായി. ഫലം നെഗറ്റീവായതിനെ തുടര്ന്ന് മറ്റ് പരിശോധനകളും നടത്തിയപ്പോഴാണ് ക്യാന്സര് സ്ഥിരീകരിച്ചത്.
1993ലെ മുംബൈ ഭീകരാക്രമണത്തില് പങ്കുണ്ടെന്ന് തെളിഞ്ഞതിനെ തുടര്ന്ന് 2013 മുതല് താരം അഞ്ച് വര്ഷം ജയില് ശിക്ഷ അനുഭവിച്ചിരുന്നു. പിന്നീട് സിനിമയിലേക്ക് തിരിച്ചെത്തി.
സഞ്ജയ് ദത്തിന്റെ അമ്മ നര്ഗിസും ആദ്യ ഭാര്യ റിച്ച ശര്മ്മയും ക്യാന്സര് ബാധിച്ചാണ് മരിച്ചത്.
