അടിമാലി: വനത്തില്‍ നടത്തിയ പരിശോധനയില്‍ പനച്ചെത്തി കള്ള് വില്‍പ്പന നടത്തുന്നത് എക്സൈസ് സംഘം പിടികൂടി. മാങ്കുളം ആനക്കുളത്തിനടുത്തുള്ള തൊണ്ണൂറ്റാറ് കുടിക്ക് സമീപമുള്ള വനത്തില്‍ നിന്നാണ് അനധികൃതമായി ഉത്പാദിപ്പിച്ച 5 ലിറ്റര്‍ പനങ്കള്ള് പിടിച്ചെടുത്തത്.
അടിമാലി നാര്‍കോട്ടിക് എന്‍ഫോഴ്‌സ്‌മെന്റ് സ്‌ക്വാഡ് സംഘം രഹസ്യ വിവരത്തിന്റെ അടിസ്ഥാനത്തിലാണ് സ്ഥലത്ത് പരിശോധന നടത്തിയത്.
വനത്തില്‍ കാണുന്ന രണ്ട് ആയത്തുംപന ചെത്തി കള്ള് ഉല്‍പ്പാദിപ്പിക്കുന്നതായി കാണപ്പെട്ടത്. പ്രതിയെ കുറിച്ച് അന്വേഷണം നടത്തി വരികയാണ്. മുകളിലേക്ക് കയറുന്നതിനായി മുളകൊണ്ട് കാലുകള്‍ നാട്ടി കാട്ടുവള്ളികള്‍ ഉപയോഗിച്ച് കെട്ടിയിരുന്നു. ഇതിനൊപ്പം ഉള്ള് എടുത്ത് കളഞ്ഞ മുള തന്നെയാണ് കള്ള് ശേഖരിക്കുന്നതിനായി സൂക്ഷിച്ചിരുന്നത്.
അബ്കാരി നിയമമനുസരിച്ച് ഈ കുറ്റകൃത്യത്തിന് പരമാവധി 10 വര്‍ഷം വരെ തടവ് ലഭിക്കാവുന്നതാണ്. എക്സൈസ് സര്‍ക്കിള്‍ ഇന്‍സ്‌പെക്ടര്‍ എം.കെ. പ്രസാദിന്റെ നേതൃത്വത്തില്‍ നടത്തിയ പരിശോധനിയില്‍ ഓഫീസര്‍മാരായ റ്റി.വി. സതീഷ്, സാന്റി തോമസ്, മീരാന്‍ കെ.എസ്, മാനുവല്‍ എന്‍.ജെ ,ഹാരിഷ് മൈതീന്‍, ശരത് എസ്.പി. എന്നിവരും പങ്കെടുത്തു. കുടിയില്‍ തന്നെ ഉള്ള ആരോ ആണ് ഇതിന് പിന്നിലെന്നാണ് വിവരം. ഇത് സംബന്ധിച്ച് അന്വേഷണം ആരംഭിച്ചതായും എക്സൈസ് ഉദ്യോഗസ്ഥര്‍ പറഞ്ഞു.
ജന്മഭൂമി ഓണ്‍ലൈന്‍