ആലുവ: ആലുവ മാര്ക്കറ്റില് ആറുപേര്ക്ക് കൂടി കൊറോണ സ്ഥിരീകരിച്ചതോടെ മാര്ക്കറ്റ് കൊറേണ ഭീതിയില്. കണ്ടൈന്മെന്റ് സോണായി പ്രഖ്യാപിക്കണമെന്നാ വശ്യപ്പെട്ട് ആരോഗ്യ വിഭാഗം കളക്ടര്ക്ക് റിപ്പോര്ട്ട് നല്കി. സമാനമായ അഭിപ്രായമാണ് പോലീസിനും. നേരത്തെ കൊറോണയുടെ ഉത്ഭവകേന്ദ്രമെന്ന് കണ്ടെത്തിയതിനെ തുടര്ന്ന് 45 ദിവസത്തോളം അടച്ചിട്ട മാര്ക്കറ്റ് കടുത്ത ഉപാധികളോടെയാണ് ഒരു മാസം മുമ്പ് തുറന്നത്.
നിയന്ത്രണങ്ങള് ഇല്ലാതായതോടെയാണ് വീണ്ടും രോഗം പടരുന്നതെന്നാണ് ആരോഗ്യ വകുപ്പിന്റെ നിഗമനം. മാര്ക്കറ്റില് നിന്ന് ഇത്രയധികം പേര്ക്ക് രണ്ടാമതും രോഗം സ്ഥിരീകരിക്കുന്നത് ഗുരുതര സാഹചര്യമാണ് സൃഷ്ടിക്കുന്നതെന്ന് ആരോഗ്യവകുപ്പ് ജീവനക്കാര് പറഞ്ഞു. മൂന്നു ചുമട്ടുതൊഴിലാളികള്, ഒരു ചായക്കടക്കാരന് എന്നിവര്ക്കാണ് ഇന്നലെ രോഗം സ്ഥിരീകരിച്ചത്. ഇതില് രണ്ട് പേരുടെ കുടുംബത്തിലെ മുഴുവന് അംഗങ്ങളും കൊറോണ ബാധിതരാണ്.
പച്ചക്കറി മാര്ക്കറ്റിലെ കരുമാല്ലൂര് മനക്കപ്പടി, ആലങ്ങാട് സ്വദേശികളായ ചുമട്ടുതൊഴിലാളികള്ക്കും ഉണക്കമീന് മാര്ക്കറ്റിലെ കുന്നത്തേരി സ്വദേശിയായ കയറ്റിറക്ക് തൊഴിലാളിക്കും അയിരൂര് സ്വദേശിയായ പച്ച മീന് വ്യാപാരി ക്കും, കായ കച്ചവടം നടത്തുന്നയാള്, ടീസ്റ്റാള് നടത്തുന്നയാള് എന്നിവര്ക്കാണ് മാര്ക്കറ്റില് കൊറോണ വൈറസ്ബാധ സ്ഥിരീകരിച്ചിരിക്കുന്നത്.
