അടിമാലി: അടിമാലി ബസ് സ്റ്റാന്‍ഡില്‍ വീണ്ടും മോഷണം. ബുധനാഴ്‌ച്ച പുലര്‍ച്ചെയാണ് അടിമാലി ബസ് സ്റ്റാന്‍ഡില്‍ പ്രവര്‍ത്തിച്ചു വരുന്ന വസ്ത്രവ്യാപാര ശാലയില്‍ മോഷണം നടന്നത്. കടയുടെ പിന്‍ഭാഗം പൊളിച്ചായിരുന്നു മോഷ്ടാവ് ഉള്ളില്‍ കടന്നത്.
ഇയാളുടെ ചിത്രം സിസിടിവിയില്‍ പതിഞ്ഞിട്ടുണ്ട്. കടക്കുള്ളില്‍ ഉണ്ടായിരുന്ന ആറായിരത്തോളം രൂപയും ഹോം തീയേറ്ററും മോഷണം പോയതായി കടയുടമ പറഞ്ഞു. ഉപയോഗിക്കാന്‍ കഴിയാത്തവിധം വസ്ത്രങ്ങള്‍ക്ക് കേടുകള്‍ വരുത്തി.
സിസിടിവിക്കും കമ്പ്യൂട്ടറിനും നാശനഷ്ടങ്ങള്‍ വരുത്തി. വസ്ത്രങ്ങള്‍ വാരിവലിച്ചിട്ട ശേഷം കടയുടെ ഭിത്തി മഷിപുരട്ടി അലങ്കോലമാക്കി. ബ്രൈഡല്‍ ഡിസൈനിംഗിനുപയോഗിക്കുന്ന വസ്തുക്കള്‍ കടക്കുള്ളിലാകെ നിരത്തി. മോഷണത്തിനൊപ്പം കടക്കുള്ളില്‍ വലിയ നഷ്ടം വരുത്തിയാണ് മോഷ്ടാവ് രക്ഷപ്പെട്ടത്.
സംഭവത്തില്‍ കടയുടമ അടിമാലി പോലീസില്‍ പരാതി നല്‍കി. ശാസ്ത്രീയ തെളിവുകള്‍ ശേഖരിച്ച് പോലീസ് അന്വേഷണം ആരംഭിച്ചു. ഏതാനും ദിവസങ്ങള്‍ക്ക് മുമ്പ് ബസ് സ്റ്റാന്‍ഡില്‍ പ്രവര്‍ത്തിക്കുന്ന മലഞ്ചരക്ക് സ്ഥാപനത്തില്‍ മോഷണം നടക്കുകയും രണ്ട് പ്രതികള്‍ പിടിയിലാവുകയും ചെയ്തിരുന്നു.
വീണ്ടും മറ്റൊരു സ്ഥാപനത്തില്‍ മോഷണം നടന്നത് വ്യാപാരികള്‍ക്കിടയില്‍ ആശങ്ക ഉയര്‍ത്തിയിട്ടുണ്ട്.
പ്രതികരിക്കാൻ ഇവിടെ എഴുതുക: