ശ്രീനാരായണ ഗുരുദേവന്റെ 93-ാമത് പരിനിര്വാണ ദിനമാണ് ഇന്ന്. മഹാഗുരുക്കന്മാരുടെ പരിനിര്വാണ സ്മൃതി, സര്വ പ്രപഞ്ചാനുഭവങ്ങളുടേയും അഥവാ സര്വനാമരൂപാനുഭവങ്ങളുടെയും നിലനില്പ്പിന് യാതൊരു പൊരുളാണോ ഹേതുവായി നിലകൊള്ളുന്നത് അതില് നിന്നും ഭിന്നമായൊരു അസ്ഥിത്വം നമുക്കില്ലെന്ന ബോധമുണര്ത്തുന്നതാണ്. അതുകൊണ്ടാണ് ഗുരുക്കന്മാരുടെ മഹാസമാധിദിനം സര്വലോകരുടെയും പ്രാര്ഥനാ ദിനമാകണമെന്ന് ജ്ഞാനികള് പറയുന്നത്.
അസ്തിത്വം ബോധ്യപ്പെടുത്തിത്തരുന്ന ആ ഓര്മ്മദിനങ്ങള് വേണ്ടവിധം ആചരിക്കപ്പെടാതെ പോയാല് അത് നമ്മുടെ ജീവത്വം മറഞ്ഞുപോകുന്നതിനും ജഡത്വം തെളിഞ്ഞു വരുന്നതിനും ഇടയാക്കും. ഇങ്ങനെ, ഒന്നുമല്ലാതായി പോകുന്നതിനുള്ളതല്ല നമ്മുടെ ജീവിതം. അത് ലോകത്തിനും കാലത്തിനും ഉപകാരപ്പെടാനുള്ളതാണ്. ആ നിയുക്തതാബോധം കൈവിടാതിരിക്കുന്നവനാണ് വിവേകി. അതില്ലാത്തവന് ജനന മരണങ്ങളുടെ ലോകത്ത് പലതവണ ജനിക്കുകയും പലതവണ മരിക്കുകയും ചെയ്യും. അതായത് നാമരൂപങ്ങളുടെ പ്രത്യക്ഷഭാവമാണ് ജനനമെന്നും അവ മറയുന്നതാണ് മരണമെന്നും അവന് ധരിച്ചു വച്ചിരിക്കുന്നു. ഇത് അജ്ഞതയുടെ ലക്ഷണമാണ്. എന്തെന്നാല് യാതൊന്നാണോ ഉള്ളതായിരിക്കുന്നത് അതിനെ അവന് അറിയുന്നില്ല. ഇല്ലാത്തതായിരിക്കുന്നതിനെ ഉള്ളതായി അവന് അറിയുകയും ചെയ്യുന്നു. ഇതിനാണ് അജ്ഞാനം എന്ന് വേദാന്തശാസ്ത്രം പറയുന്നത്.
അജ്ഞാനികളുടെ ഈ ഭ്രമാനുഭവം വസ്തുസ്ഥിതി ബോധത്തില് നിന്നും ഉണ്ടാകുന്നതാണ്. ഇതുണ്ടാക്കുന്നത് നമ്മുടെ മനസ്സാണ്. മനസ്സ് ഉള്ളതിനെ ഇല്ലാത്തതായും ഇല്ലാത്തതിനെ ഉള്ളതായും തോന്നിപ്പിക്കും. ആ മനസ്സാണ് സര്വബന്ധങ്ങളേയും രാഗദ്വേഷങ്ങളേയും ഉണ്ടാക്കുന്നത്. അതില് നിന്നാണ് വ്യാവഹാരികളായ ഒരു ലോകവും സുഖദുഃഖാദികളും നമുക്കുണ്ടാകുന്നത്. മനസ്സിന്റെ മേല്പ്പറഞ്ഞ തോന്നിപ്പിക്കലിലെ അര്ഥമില്ലായ്മ പോലെയൊന്ന് മനസ്സിന്റെ എല്ലാ തോന്നിപ്പിക്കലുകള്ക്കും സങ്കല്പ്പങ്ങള്ക്കും വാസനകള്ക്കും ബന്ധങ്ങള്ക്കും വ്യവഹാരങ്ങള്ക്കുമെല്ലാം ഉണ്ടെന്ന് തിരിച്ചറിഞ്ഞവരാണ് ഗുരുക്കന്മാര്. അങ്ങനെ, മരണവുമില്ല പുറപ്പുമില്ല വാഴ്വും നരസുരരാദിയുമില്ല നാമരൂപം എന്ന് ആത്മോപദേശ ശതകത്തില് വെളിപ്പെടുത്തുന്ന സത്യത്തെ സാക്ഷാത്ക്കരിച്ച ജീവന്മുക്തന്മാരുടെ ദേഹത്യാഗത്തിനാണ് മഹാസമാധി എന്നു അഭിജ്ഞന്മാര് പറയുന്നത്. മനസ്സിനെ നിഗ്രഹിച്ച, വാസനാബന്ധമറ്റ ജീവന്മുക്തന്മാരുടെ ദേഹത്യാഗത്തിനല്ലാതെ ‘സമാധി’യെന്ന് വിവക്ഷിക്കുവാന് പാടില്ലാത്തതാണ്.
ഗുരുദേവന് നിത്യനിര്മുക്തനായ മഹര്ഷിയായിരുന്നു. ത്യാഗിയായിരുന്നു. ജീവന്മുക്തനായിരുന്നു. ഗുണാതീതനായ അദൈ്വതിയായിരുന്നു. സാക്ഷാല് ബ്രഹ്മമായിരുന്നു.
കൊറോണ തീര്ത്ത സാമൂഹ്യാകലം പാലിച്ചുകൊണ്ടു തന്നെ ഗുരുദേവന്റെ മഹാസമാധിദിനം അതിജീവനത്തിന്റെ പ്രാര്ഥനാദിനമായി നമുക്കൊന്നായി ആചരിക്കാം.
വിശുദ്ധാനന്ദ സ്വാമികള്
(പ്രസിഡന്റ്, ശ്രീനാരായണ ധര്മ്മസംഘംട്രസ്റ്റ്)
