ന്യൂദല്ഹി: ചെന്നൈ സൂപ്പര് കിങ്സിന്, പരിചയസമ്പന്നനായ ഹര്ഭജന് സിങ്ങിന് പകരക്കാരനെ കണ്ടെത്തുക വിഷമകരമാകുമെന്ന് മുന് ഇന്ത്യന് പേസര് ഇര്ഫാന് പഠാന്. കഴിഞ്ഞയാഴ്ചയാണ് ഹര്ഭജന് ഐപിഎല്ലില് നിന്ന് പിന്മാറുന്നതായി അറിയിച്ചത്.
ആഭ്യന്തര ക്രിക്കറ്റില് നിലവാരമുള്ള സ്പിന്നര്മാര് കുറവാണ്. ഈ സാഹചര്യത്തില് ഹര്ഭജന് പകരക്കാരനെ കണ്ടെത്തുക വിഷമകരമാകും. പല സ്പിന്നര്മാരെയും ചെന്നൈ മാനേജ്മെന്റ് പരിഗണിക്കുന്നതായാണ് അറിയാന് കഴിഞ്ഞത്. എന്നിരുന്നാലും ഹര്ഭജന് പകരം വയ്ക്കാവുന്ന സ്പിന്നറെ കണ്ടെത്താന് കഴിയില്ലെന്ന് പഠാന് പറഞ്ഞു. സ്റ്റാര് സ്പോര്ട്സ് പരിപാടിയില് സംസാരിക്കുകയായിരുന്ന പഠാന്.
സുരേഷ് റെയ്നയ്ക്ക് പിന്നാലെയാണ് ഹര്ഭജനും ഐപിഎല്ലില് നിന്ന് പിന്മാറിയത്. റെയ്ന ഐപിഎല്ലില് തിരിച്ചെത്തുമെന്നാണ് പ്രതീക്ഷ. അതിനുള്ള സാധ്യത നിലനില്ക്കുന്നുണ്ടെന്നും പഠാന് പറഞ്ഞു. റെയ്നയും ഹര്ഭജനും പിന്മാറിയത് ചെന്നൈയുടെ പ്രകടനത്തെ ബാധിച്ചേക്കും.
