ദുബായ് : കൊറോണ വൈറസിന്റെ പശ്ചാത്തലത്തില്‍ ലോകഡൗണ്‍ പ്രഖ്യാപിച്ചെങ്കിലും ഇന്ത്യയിലേക്ക് എത്തിയത് വന്‍ നിക്ഷേപങ്ങള്‍. ലോക് ഡൗണ്‍ കാലയളവിലും നിക്ഷേപങ്ങള്‍ ആകര്‍ഷിക്കാനായത് പ്രധാനമന്ത്രി നരേന്ദ്രമോഗിയുടെ നേതൃത്വത്തിലുള്ള കേന്ദ്ര സര്‍ക്കാരിന്റെ നേട്ടമാണെന്ന് ലുലുഗ്രൂപ്പ് ചെയര്‍മാന്‍ എം.എ. യൂസഫലി.
അതേസമയം വിമാനത്താവളങ്ങളില്‍ ഭൂരിഭാഗവും വികസിപ്പിക്കുന്നത് സ്വകാര്യ പങ്കാളിത്തത്തിലാണെന്നും അദ്ദേഹം പറഞ്ഞു. വിവാദങ്ങളുണ്ടാക്കി വികസനം മുടങ്ങുന്നത് കേരളത്തിന് നല്ലതല്ല. പ്രമുഖ മാധ്യമത്തിന് നല്‍കിയ അഭിമുഖത്തിലാണ് യൂസഫലി ഇക്കാര്യം അറിയിച്ചത്.
തിരുവനന്തപുരത്തിന്റെ വികസനത്തിന് വിമാനത്താവളത്തിന്റെ പ്രവര്‍ത്തനം മെച്ചപ്പെടുത്തേണ്ടത് അത്യന്താപേക്ഷിതമാണ്. വിമാനത്താവളം കേന്ദ്ര സര്‍ക്കാരിന്റെ വസ്തു ആയതിനാല്‍ അവര്‍ പറയുന്നവര്‍ക്ക് വികസന പ്രവര്‍ത്തനങ്ങള്‍ നടത്താനുള്ള ചുമതല ലഭിക്കുമെന്നും യൂസഫലി പറഞ്ഞു. കൊച്ചി രാജ്യാന്തര വിമാനത്താവളത്തിന് 27 രാജ്യങ്ങളില്‍ നിന്നുള്ള 19600 ഓഹരിയുടമകളാണുള്ളത്. കണ്ണൂരില്‍ 8313 ഓഹരിയുടമകളുണ്ട്. ഇനിയും 2200 കോടി രൂപയുടെ ഓഹരി നല്‍കാനുണ്ട്. ഈ വിമാനത്താവളങ്ങളിലെല്ലാം ഓഹരിയുള്ള വ്യക്തിയാണ് യൂസഫലി.
പ്രശ്‌നങ്ങളുണ്ടെങ്കില്‍ കേന്ദ്രവും കേരളവും തമ്മില്‍ പരിഹരിക്കണം. എയര്‍പോര്‍ട് അതോറിറ്റിയുടെ ചുമതലയിലായിരുന്നപ്പോള്‍ വികസിപ്പിക്കാത്ത വിമാനത്താവളങ്ങള്‍ പലതും സ്വകാര്യ പങ്കാളിത്തം വന്ന ശേഷമാണ് മെച്ചപ്പെട്ടത്. അദാനി തന്റെ സുഹൃത്താണെന്നും അദ്ദേഹം പറഞ്ഞു. തിരുവനന്തപുരം വിമാനത്താവള വികനസനവുമായി ബന്ധപ്പെട്ട് താനുമായി ഇതുവരെ സംസ്ഥാന സര്‍ക്കാര്‍ ചര്‍ച്ച ചെയ്തിട്ടില്ല. ചര്‍ച്ചചെയ്യുമ്പോള്‍ ഓഹരിപങ്കാളിത്തം എടുക്കുന്നത് സംബന്ധിച്ച് അഭിപ്രായം അറിയിക്കും. ഇതുമായി ബന്ധപ്പെട്ട് അനാവശ്യമായി തന്റെ പേര് ഇതിലേക്ക വലിച്ചിഴയ്‌ക്കരുതെന്നും യൂസഫലി അറിയിച്ചു.
ഏത് വിധേനയും വിമാനത്താവള വികസനം നടപ്പാക്കണം. ലുലു ഗ്രൂപ്പും തിരുവനന്തപുരത്ത് 1100 കോടിയുടെ നിക്ഷേപമാണ് നടത്തുന്നത്. ദക്ഷിണേന്ത്യയിലെ ഏറ്റവും വലിയ രണ്ടാമത്തെ മാളാണ് മാര്‍ച്ചില്‍ തുറക്കാന്‍ പോകുന്നത്. ടാജ് ഹോട്ടല്‍ മോടിയാക്കി ആയിരത്തോളം പേര്‍ക്കിരിക്കാവുന്ന കണ്‍വെന്‍ഷന്‍ സെന്ററടക്കം നിര്‍മിക്കുകയാണ്.
പ്രതികരിക്കാൻ ഇവിടെ എഴുതുക: