മൂന്നാര്: പെട്ടിമുടി ദുരന്തത്തില് കാണാതായവര്ക്കായുള്ള തെരച്ചില് തുടരുമ്പോള് ദുരന്തമുണ്ടായ അന്ന് മുതല് വിശ്രമമില്ലാതെ ദുരന്തഭൂമിയില് സേവനം അനുഷ്ഠിച്ച് വരുന്നൊരു വിഭാഗമാണ് റവന്യൂ ജീവനക്കാര്. ജില്ലാ കളക്ടറുടെ നിര്ദ്ദേശ പ്രകാരം ദുരന്തമുഖത്ത് പ്രവര്ത്തനങ്ങള് അത്രയും ഏകോപിപ്പിച്ച് ദേവികുളം സബ്കളക്ടര് എസ്. പ്രേം കൃഷ്ണ ഉള്പ്പെടെയുള്ള ഒരു വിഭാഗം ഉദ്യോഗസ്ഥര് പെട്ടിമുടിയില് കര്മ്മനിരതരാണ്.
തെരച്ചില് നടത്തുന്ന എന്ഡിആര്എഫ്, ഫയര്ഫോഴ്സ്, പോലീസ്, വനംവകുപ്പ് സേനാംഗങ്ങള്ക്ക് ആവശ്യമായ സഹായങ്ങള് എത്തിച്ച് നല്കുന്നതില് റവന്യൂ ഉദ്യോഗസ്ഥര് കണിശത പുലര്ത്തിപ്പോരുന്നു. വിശ്രമമില്ലാതെ തെരച്ചില് നടത്തുന്ന സേനാംഗങ്ങള്ക്കും മറ്റാളുകള്ക്കും യഥാസമയം ഭക്ഷണമെത്തിച്ച് നല്കുന്ന കാര്യത്തിലും താമസ സൗകര്യവും യാത്രാ സൗകര്യവും ലഭ്യമാക്കുന്ന കാര്യത്തിലും റവന്യൂ ഉദ്യോഗസ്ഥരുടെ കൃത്യതയാര്ന്ന ഇടപെടലുണ്ട്.
ദുരന്തമുഖത്ത് നിന്ന് കണ്ടെടുക്കുന്ന മൃതദേഹങ്ങള് സംസ്ക്കരിക്കാനുള്ള നടപടികള് സ്വീകരിച്ച് പോരുന്നതും പെട്ടിമുടിയില് കര്മ്മനിരതരായിട്ടുള്ള റവന്യൂ ഉദ്യോഗസ്ഥരാണ്. അസിസ്റ്റന്റ് കളക്ടര് സൂരജ് ഷാജി, തഹസീല്ദാര് ജിജി കുന്നപ്പള്ളി, സ്പെഷ്യല് തഹസീല്ദാര് ബിനു ജോസഫ്, ഭൂരേഖ തഹസീല്ദാര് ആര് രാധാകൃഷ്ണന്, മൂന്നാര് വില്ലേജ് ഓഫീസര് സിദ്ദിഖ് തുടങ്ങിയവരെല്ലം ദുരന്തഭൂമിയില് വിവിധ പ്രവര്ത്തനങ്ങള് ഏകോപിപ്പിച്ച് വരുന്നു. മൂന്നാര് ഗ്രാമപഞ്ചായത്ത് അധികൃതരും പെട്ടിമുടിയിലെ തെരച്ചില് മേഖലകളില് സജീവസാന്നിധ്യമായുണ്ട്.
ജന്മഭൂമി ഓണ്ലൈന്