ചേര്‍ത്തല: നഗരത്തിലെ ജുവലറി യുവാവ് അടിച്ച് തകര്‍ത്തു. പടയണി പാലത്തിന് സമീപത്തെ വി. ജോണ്‍ ജുവലറിയാണ് തല്ലി തകര്‍ത്തത്. ജീവനക്കാരെ കത്തിയുമായി ആക്രമിക്കാന്‍ ശ്രമിച്ചതോടെ ഇവര്‍ ഓടി രക്ഷപ്പെട്ടു. ഇന്നലെ രാവിലെ പത്തോടെയായിരുന്നു സംഭവം. കടക്ക് ഉള്ളിലേക്ക് ഓടി കയറിയ ഇയാള്‍ മുന്‍ഭാഗത്തെ ഗ്ലാസും കൗണ്ടറും ഷെല്‍ഫും ത്രാസുകളുമടക്കം തല്ലിതകര്‍ത്തു. കസേര ഉപയോഗിച്ചാണ് ചില്ല് തല്ലി പൊളിച്ചത്. സ്ത്രീ ജീവനക്കാരാണ് ഈ സമയം കടയില്‍ ഉണ്ടായിരുന്നത്.
ഇവരുടെ നേരെ അക്രമി തിരിഞ്ഞതോടെ സമീപത്തെ കടയില്‍ കയറി രക്ഷപ്പെടുകയായിരുന്നു. പ്രദേശത്ത് ഏറെ നേരം ഭീകരാന്തരീക്ഷം സൃഷ്ടിച്ച ശേഷമാണ് ഇയാളെ പോലീസ് എത്തി പിടികൂടിയത്. സമീപത്തെ ഓട്ടോ സ്റ്റാന്‍ഡില്‍ എത്തിയ ഇയാള്‍ യാതൊരു പ്രകോപനവുമില്ലാതെ കടയിലേക്ക് ഓടി കയറുകയായിരുന്നെന്ന് ദൃക്‌സാക്ഷികള്‍ പറഞ്ഞു.
ലക്ഷങ്ങളുടെ നഷ്ടമുണ്ടായതായി ഉടമ ജിതിന്‍ ജോണ്‍ വാളമ്മക്കാട് പറഞ്ഞു. ഇയാള്‍ക്ക് മാനസീക അസ്യാസ്ഥ്യമുണ്ടെന്നും നേരത്തെ മറ്റൊരു സ്ഥാപനത്തിലും അക്രമം കാട്ടിയിട്ടുണ്ടെന്നും പോലീസ് പറഞ്ഞു.
പ്രതികരിക്കാൻ ഇവിടെ എഴുതുക: