കൊച്ചി : സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണനെ ആര്എസ്എസിലേക്ക് സ്വാഗതം ചെയ്ത് ബിജെപി നേതാവ് ബി.ഗോപാലകൃഷ്ണന്. നാളിത് വരെ ചെയ്ത ദേശദ്രോഹത്തിന് പ്രായശ്ചിത്തം ചെയ്യുന്നതിനും ഇന്ത്യ വേണൊ, ചൈന വേണോ എന്ന സംശയം തീര്ക്കാനും അവസരം എന്നറിയിച്ചുകൊണ്ടാണ് ആര്എസ്എസിലേക്ക് ക്ഷണിച്ചിരിക്കുന്നത്. ഫേസ്ബുക്ക് പോസ്റ്റിലൂടെയാണ് ഗോപാലകൃഷ്ണന് ഇത്തരത്തില് പ്രസ്താവന നടത്തിയത്.
പോളിറ്റ് ബ്യൂറോ അംഗം എസ്ആര്പിയെ പോലെ മൂല്യാധിഷ്ഠിത ജീവിതം നയിക്കാനും ആര്എസ്എസില് വരുമ്പോള് താങ്കള്ക്ക് സാധിക്കും. ആര്എസ്എസുകാരനായിരുന്നുവെന്ന് എസ്ആര്പി അഭിമാനത്തോടെ പറഞ്ഞ സാഹചര്യത്തില് എകെജി സെന്റെറിലെ മറ്റ് അംഗങ്ങള്ക്കും ഇത് പ്രചോദനമാകും.
ഇന്ന് നിലവിലുള്ളവരും നാളെ വരുവാനുള്ള വരും എന്നതാണ് ആര്എസ്എസ് ന്റെ കാഴ്ചപ്പാട്. എന്നായിരുന്നു അഡ്വ. ഗോപാലകൃഷ്ണന്റെ എഫ്ബി പോസ്റ്റ്. നേരത്തെ പ്രതിപക്ഷ നേതാവ് രമേശ് ചെന്നിത്തല ആര്എസ്എസിന്റെ സര്സംഘചാലകാണെന്ന കോടിയേരിയുടെ പ്രസ്താവന വിവാദമായിരുന്നു. ഇതിന് പിന്നാലെ കോടിയേരിക്കെതിരെ നിരവധി കോണ്ഗ്രസ് നേതാക്കള് രംഗത്ത് വരികയും ചെയ്തു. ഈ പശ്ചാത്തലത്തിലാണ് ബിജെപി നേതാവിന്റെ പ്രസ്താവനയും പുറത്തുവരുന്നത്.
അതേസമയം സിപിഎം പോളിറ്റ് ബ്യൂറോ അംഗം എസ്. രാമചന്ദ്രന് പിള്ള പണ്ട് ആര്എസ്എസ് ശാഖയില് പോയിരുന്ന ആളാണെന്ന് ജന്മഭൂമി റിപ്പോര്ട്ട് ചെയ്തിരുന്നു. ഇക്കാര്യം എസ്ആര്പി സ്ഥിരീകരിച്ചതോടെ സിപിഎം പ്രതിരോധത്തിലാവുകയും ചെയ്തിരുന്നു. അതിനിടെയാണ് കോടിയേരിയെ തന്നെ ആര്എസ്എസിലേക്ക് ക്ഷണിച്ച് ബി.ഗോപാലകൃഷ്ണന് രംഗത്തു വരുന്നത്.
