പാരീസ്: ഫ്രഞ്ച് സ്‌ട്രൈക്കര്‍ കൈലിയന്‍ എംബാപ്പെ പാരീസ് സെന്റ് ജര്‍മന്‍സ് (പിഎസ്ജി) വിടുമെന്ന അഭ്യൂഹങ്ങള്‍ അവസാനിച്ചു. അടുത്ത സീസണില്‍ പിഎസ്ജി വിട്ട് മറ്റൊരു ക്ലബ്ബിലും ചേരില്ലെന്ന് എംബാപ്പെ വെളിപ്പെടുത്തി.
ഞാന്‍ ഇവിടെ തന്നെ തുടരും. ക്ലബ്ബിന്റെ 50-ാം വാര്‍ഷികം ആഘോഷിക്കുന്ന ഈ വര്‍ഷം ഏറെ പ്രാധാന്യം അര്‍ഹിക്കുന്നതാണ്. അതിനാല്‍ ഞാന്‍ പിഎസ്ജി വിട്ടുപോകില്ലെന്ന് എംബാപ്പെ പറഞ്ഞു. പ്രീമിയര്‍ ലീഗ് ചാമ്പ്യന്മാരായ ലിവര്‍പൂള്‍ ടീമിലേക്കോ ലാലിഗ ചാമ്പ്യന്മാരായ റയല്‍ മാഡ്രിഡിലേക്കോ എംബാപ്പെ ചേക്കേറുമെന്ന് നേരത്തെ റിപ്പോര്‍ട്ടുകള്‍ ഉണ്ടായിരുന്നു.
ഇരുപത്തിയൊന്നുകാരനായ എംബാപ്പെ ലോക ഫുട്‌ബോളിലെ മികച്ച താരങ്ങളിലൊരാളാണ്. നാലു തവണ ലീഗ് വണ്‍ കിരീടം ചൂടി. ഒരു തവണ മൊണോക്കോയ്‌ക്കൊപ്പവും മൂന്ന് തവണ പിഎസ്ജിക്ക് ഒപ്പവുമാണ് എംബാപ്പെ ലീഗ് വണ്‍ കിരീടം സ്വന്തമാക്കിയത്. ഈ സീസണില്‍ പിഎസ്ജിക്കായി 33 മത്സരങ്ങളില്‍ 30 ഗോളുകള്‍ നേടി. 17 ഗോളുകള്‍ക്ക് വഴിയും ഒരുക്കി.
പ്രതികരിക്കാൻ ഇവിടെ എഴുതുക: