ഇടുക്കി : സര്‍വ്വേയ്‌ക്കെത്തിയ റവന്യൂ- വനം വകുപ്പ് ഉദ്യോഗസ്ഥര്‍ക്ക് നേരെ സിപിഐ നേതാവിന്റെ ഭീഷണിപ്പെടുത്തല്‍. ഇടുക്കി മാങ്കുളത്ത് സര്‍വ്വേയ്‌ക്കെത്തിയ ഉദ്യോഗസ്ഥര്‍ക്കു നേരെ സിപിഐ ലോക്കല്‍ സെക്രട്ടറി പ്രവീണ്‍ ജോസാണ് ഭീഷണി മുഴക്കിയത്. ഇതിന്റെ വീഡിയോ ദൃശ്യങ്ങളും പുറത്തുവന്നിട്ടുണ്ട്.
കഴിഞ്ഞദിവസം മാങ്കുളം വനം ഡിവിഷന്‍ സര്‍വ്വേയ്‌ക്ക് എത്തിയപ്പോഴാണ് സംഭവം നടക്കുന്നത്. ഉദ്യോഗസ്ഥര്‍ക്കു നേരെ തട്ടിക്കയറിയ പ്രവീണ്‍ റേഞ്ച് ഓഫീസറെ കെട്ടിയിട്ട് തല്ലും, പഞ്ചായത്ത് തെരഞ്ഞെടുപ്പ് കഴിയട്ടെ, അതിനു ശേഷം ഇത് നടപ്പിലാക്കുമെന്നായിരുന്നു ഭീഷണി. പ്രവീണിന്റെ ഭീഷണിപ്പെടുത്തല്‍ ചിത്രീകരിച്ചപ്പോള്‍ ഉദ്യോഗസ്ഥരെ വെല്ലുവിളിക്കുകയും ചെയ്തിരുന്നു.
റേഞ്ച് ഓഫീസറെ ചീത്തവിളിച്ചതിന് തന്റെ പേരില്‍ ഇതിനു മുമ്പും കേസെടുത്തിട്ടുണ്ട്. ഇത് കൂടാതെ അഞ്ച് കേസുകള്‍ കൂടി തന്റെ പേരില്‍ ഉണ്ടെന്നായിരുന്നു വെല്ലുവിളി. ഇതുമായി ബന്ധപ്പെട്ട് വനം വകുപ്പ് ഉദ്യോഗസ്ഥര്‍ മൂന്നാര്‍ പോലീസില്‍ പരാതി നല്‍കി.
