ആലപ്പുഴ : സംസ്ഥാനത്ത് വീണ്ടും കൊറോണ വൈറസ് മരണം സ്ഥിരീകരിച്ചു. ആലപ്പുഴ വണ്ടാനം മെഡിക്കല്‍ കോളേജ് ആശുപത്രിയില്‍ ചികിത്സയിലിരിക്കെ മരിച്ച ചുനക്കര സ്വദേശി നസീറിന്റെ പരിശോധനാഫലമാണ് പോസിറ്റീവായത്. 47 വയസായിരുന്നു.
ജൂലൈ ആദ്യം സൗദിയില്‍ നിന്നാണ് നസീര്‍ നാട്ടില്‍ എത്തിയത്. തുടര്‍ന്ന് കോട്ടയം മെഡിക്കല്‍ കോളേജില്‍ ചികിത്സ തേടിയിരുന്നു. പിന്നീട് ആലപ്പുഴ മെഡിക്കല്‍ കോളേജിലേക്ക് മാറ്റുകയായിരുന്നു. ഞായറാഴ്ച പുലര്‍ച്ചെയാണ് ഇയാള്‍ മരിച്ചത്.
സംസ്ഥാനത്ത് മരിച്ച ശേഷം കൊറോണ സ്ഥിരീകരിക്കുന്നത് വര്‍ധിച്ചുകൊണ്ടിരിക്കുകയാണ്. ഇത് ജനങ്ങളിലും ആരോഗ്യ പ്രവര്‍ത്തകര്‍ക്കിടയിലും ആശങ്ക ഉളവാക്കുന്നുണ്ട്. മരിച്ച് ഒന്നും രണ്ടും ദിവസങ്ങള്‍ കഴിഞ്ഞ് കൊറോണ വൈറസ് രോഗബാധ സ്ഥിരീകരിക്കുമ്പോള്‍ ചിലരുടെ സംസ്‌കാര ചടങ്ങുകള്‍ വരെ കഴിഞ്ഞിട്ടുണ്ടാകും. കോവിഡ് പ്രോട്ടോക്കോള്‍ പാലിക്കാതെ സംസ്‌കാരം നടത്തുന്നത് ചിലപ്പോള്‍ രോഗബാധ വീണ്ടും വ്യാപിക്കാന്‍ ഇടവരുത്തിയേക്കാം.
