കഞ്ഞിക്കുഴി: വരിക്കമുത്തനില് ആരംഭിച്ച കുടുംബശ്രീയുടെ മണ്സൂണ് മാര്ക്കറ്റ് വിലക്കുറവും ഗുണമേന്മയും കൊണ്ട് ജനശ്രദ്ധയാകര്ഷിക്കുന്നു.
വിലക്കയറ്റം നിയന്ത്രിക്കുക, മിതമായ വിലയില് ഗുണമേന്മയുള്ള ഉത്പന്നങ്ങള് ഗ്രാമവാസികളിലെത്തിക്കുക, കര്ഷകര്ക്കും വനവാസി വിഭാഗങ്ങള്ക്കും അവരുടെ കാര്ഷിക ഉത്പന്നങ്ങളും വനവിഭവങ്ങളും ന്യായവിലയില് വിറ്റഴിക്കാന് വിപണി ഒരുക്കുക തുടങ്ങിയ ലക്ഷ്യത്തോടെയാണ് കഞ്ഞിക്കുഴിയിലെ ഉള്നാടന്ഗ്രാമമായ വരിക്കമുത്തനില് കുടുംബശ്രീ മാര്ക്കറ്റ് തുടങ്ങിയത്. കഞ്ഞിക്കുഴി പതിനേഴാം വാര്ഡിലെ 28 കുടുംബശ്രീ യൂണിറ്റുകള് സംയുക്തമായിട്ടാണ് മാര്ക്കറ്റ് ആരംഭിച്ചതും പ്രവര്ത്തനം നിയന്ത്രിക്കുന്നതും. പലചരക്ക് സാധനങ്ങള്, പച്ചക്കറി, കാര്ഷിക വിളകള് എന്നിവ വിപണിവിലയേക്കാള് കുറഞ്ഞ വിലയ്ക്ക് കുടുംബശ്രീയുടെ മാര്ക്കറ്റില് ലഭ്യമാണ്.
വിവിധ കുടുംബശ്രീ യൂണിറ്റുകളുടെ ഉത്പന്നങ്ങളും ഇവിടെ വില്പനയ്ക്കെത്തിച്ചിട്ടുണ്ട്. തുണിത്തരങ്ങള്, കാപ്പിപൊടി, മുളക് പൊടി, മഞ്ഞള്പൊടി, മല്ലിപ്പൊടി അടക്കം വിവിധ ഇനം കറിപ്പൊടികള് തുടങ്ങി മെഴുകുതിരി മുതല് മുഖാവരണങ്ങള് വരെയുള്ള കുടുംബശ്രീ ഉത്പന്നങ്ങളും മിതമായ നിരക്കില് ഇവിടെ നിന്ന് ലഭിക്കും. അരി മുതലായ പലചരക്ക് സാധനങ്ങള് കമ്പനികളില് നിന്ന് നേരിട്ട് വാങ്ങിയാണ് ചില്ലറ വില്പന നടത്തുന്നത്.
ഇത് ഉപഭോക്താവിന് ന്യായവിലയ്ക്ക് വില്ക്കാന് കഴിയുന്നതിനൊപ്പം സംരംഭത്തിന് ലാഭവും നേടികൊടുക്കുന്നുതായി വാര്ഡ് മെമ്പര് സന്തോഷ് കുമാര് പറഞ്ഞു. ലാഭത്തിനേക്കാള് ഇവര് പ്രാധാന്യം നല്കുന്നത് ഒരു വനിത സംരംഭത്തിലൂടെ തങ്ങളുടെ ഉത്പന്നങ്ങള് വിറ്റഴിക്കാന് വിപണിയൊരുക്കുകയെന്നതും കൊറോണ, പ്രളയം തുടങ്ങിയ പ്രതികൂല സാഹചര്യങ്ങളിലും മിതമായ വിലയില് ഉത്പന്നങ്ങള് സാധാരണക്കാരിലേക്കെത്തിക്കുക എന്നതിനുമാണ്. ലോക്ക്ഡൗണ് കാലത്ത് സാധനങ്ങള് വാങ്ങുവാന് സഹായത്തിനായി തുടങ്ങിയ താത്കാലിക മാര്ക്കറ്റ് ലോക്ക്ഡൗണിന് ശേഷം മണ്സൂണ് മാര്ക്കറ്റായി പുനരാരംഭിച്ചതാണ്. ജനങ്ങള് നല്കിയ
പിന്തുണയാണ് മാര്ക്കറ്റ് വീണ്ടും തുടങ്ങാന് കുടുംബശ്രീ അംഗങ്ങളെ പ്രേരിപ്പിച്ചത്. മണ്സൂണ് മാര്ക്കറ്റ് സ്ഥിരം സംവിധാനമാക്കി മാറ്റുന്നതിനുള്ള സാധ്യതകളും തേടുന്നുണ്ട്. കഞ്ഞിക്കുഴി ഗ്രാമപഞ്ചായത്തിന്റെ വരിക്കമുത്തന് കമ്യൂണിറ്റി ഹാളിലാണ് ഇപ്പോള് കുടുംബശ്രീ മണ്സൂണ് മാര്ക്കറ്റ് പ്രവര്ത്തിക്കുന്നത്.
