മലപ്പുറം: എടപ്പാളില് കഴിഞ്ഞ ദിവസം കൊറോണ സ്ഥിരീകരിച്ച ഡോക്ടര്മാരുടെ സമ്പര്ക്കപ്പട്ടികയില് നവജാത ശിശുക്കളടക്കം ഇരുപതിനായിരത്തോളം പേര്. ആരോഗ്യ വകുപ്പിന്റെ നിര്ദേശപ്രകാരം ആശുപത്രി അധികൃതര് തയാറാക്കിയ പട്ടികയില് മാത്രമുള്ള കണക്കാണിത്.
ശിശുരോഗ ചികിത്സകനായ വട്ടംകുളം ശുകപുരം സ്വദേശിയെ കാണാന് ഒപിയിലെത്തിയത് രോഗികളും ബന്ധുക്കളുമടക്കം 10,000 പേരും ഐപിയിലെത്തിയത് 160 പേരുമാണ്. വട്ടംകുളം കണ്ണഞ്ചിറ സ്വദേശി ഒപിയിലും ഐപിയിലുമായി കണ്ടത് 5,500 പേരെയാണ്. ഇവര്ക്കൊപ്പമുള്ള ബന്ധുക്കളുടെ കണക്ക് വേറെ. ജൂണ് അഞ്ചിന് ശേഷം ഇവരെ കണ്ടവരുടെ പട്ടികയാണ് ഇപ്പോള് തയാറാക്കിയിട്ടുള്ളത്. എല്ലാവരോടും വീടുകളില് ക്വാറെന്റെനില് കഴിയാനാണ് ആരോഗ്യ വകുപ്പ് നിര്ദേശിച്ചിട്ടുള്ളത്.
ഇവരില് 1000 പേരെ രണ്ട് ദിവസത്തിനകം പരിശോധനയ്ക്ക് വിധേയമാക്കാനാണ് തീരുമാനമെന്ന് മലപ്പുറം ഡിഎംഒ കെ. സക്കീന അറിയിച്ചു. ഇന്നലെ മലപ്പുറം ജില്ലയില് കൊറോണ സ്ഥിരീകരിച്ച അഞ്ചു പേര് എടപ്പാള്-പൊന്നാനി മേഖലയിലുള്ളവരാണ്.
സമൂഹവ്യാപനം സംശയിക്കുന്ന പൊന്നാനി താലൂക്കില് ജൂലൈ ആറു വരെ ട്രിപ്പിള് ലോക്ഡൗണ് പ്രഖ്യാപിച്ചു. ഉറവിടമറിയാത്ത രോഗികള് പെരുകുന്ന സാഹചര്യത്തിലാണ് നടപടി. അതിനിടെ ജൂണ് 24ന് മഞ്ചേരി മെഡിക്കല് കോളേജില് മരിച്ച തമിഴ്നാട് സ്വദേശി അരസാകരന് (55) കൊറോണ സ്ഥിരീകരിച്ചു. ഇതോടെ സംസ്ഥാനത്ത് മരിച്ചവരുടെ എണ്ണം 23 ആയി.
ജന്മഭൂമി ഓണ്ലൈന്