മൂലമറ്റം: കുളമാവ് കിളിവള്ളിയില്‍ 3 കടകളില്‍ നിന്നായി 13000 രൂപയുടെ സാധനങ്ങള്‍ മോഷണം പോയി. കുളമാവ് ഡാമിന് സമീപം ലഘുഭക്ഷണശാല നടത്തുന്ന പെട്ടിക്കടകളിലാണ് ഇന്നലെ പുലര്‍ച്ചെ മോഷണം നടന്നത്.
ദിലീപ് ഏലിയാസ്, തങ്കമ്മ ഗോപി, കുമാരി രാജു എന്നിവരുടെ പെട്ടിക്കടകളിലാണ് മോഷണം. ഇവരുടെ പെട്ടിക്കടകളില്‍ നിന്നും പണം, ബേക്കറി ഐറ്റംസ്, സിഗരറ്റ്, ബീഡിയടക്കമുള്ള സാധനങ്ങളാണ് മോഷണം പോയത്. ദീലീപിന് 4000 രൂപയുടെയും തങ്കമ്മയ്‌ക്ക് 2000 രൂപയുടെയും കുമാരി രാജുവിന്റെ കടയില്‍ നിന്നും 7000 രൂപയുടെയും സാധനങ്ങളാണ് മോഷണം പോയത്. കുളമാവ് ഡാമിന് സമീപം കിളിവള്ളിയില്‍ പെട്ടിക്കട നടത്തുന്നവരാണ് ഇവര്‍.
കടയുടെ എതിര്‍വശത്തായി ഡാമിന്റെ സുരക്ഷയ്‌ക്കായി പോലീസ് ക്യാംപ് ഉണ്ട്. 24 മണിക്കൂറും ഡ്യൂട്ടിയില്‍ പോലീസ് ഉള്ളപ്പോള്‍ മോഷണം നടന്നത് പ്രദേശവാസികളെ ഭീതിയിലാക്കിയിരിക്കുകയാണ്. കുളമാവ് പോലീസ് സംഭവസ്ഥലത്ത് എത്തി പരിശോധന നടത്തി.
