മലപ്പുറം: ഓണ്ലൈന് ക്ലാസില് പങ്കെടുക്കാന് സാധിക്കാത്തതില് മനംനൊന്ത് വിദ്യാര്ത്ഥിനി ആത്മഹത്യ ചെയ്തു. മലപ്പുറം വളാഞ്ചേരി ഇരുമ്പിളിയം മാങ്കേരി ദളിത് കോളനിയിലെ കുളത്തിങ്ങല് വീട്ടില് ബാലകൃഷ്ണന്-ഷീബ ദമ്പതികളുടെ മകള് ദേവിക(14) ആണ് തീപ്പൊള്ളലേറ്റ് മരിച്ചത്.
തിങ്കളാഴ്ച വൈകിട്ടടോടെയാണ് വീടിന് സമീപത്തെ ആളൊഴിഞ്ഞ വീടിന് മുറ്റത്ത് ദിവ്യയുടെ മൃതദ്ദേഹം കണ്ടെത്തിയത്. ഇരിമ്പിളിയം ഗവ.ഹയര്സെക്കണ്ടറി സ്കൂളിലെ പത്താം ക്ലാസ് വിദ്യാര്ത്ഥിനിയായിരുന്നു. മലപ്പുറം എസ്പിയുടെ നേതൃത്വത്തിലുള്ള സംഘം സ്ഥലത്തെത്തി നടപടി ക്രമങ്ങള് പൂര്ത്തിയാക്കി. ഇന്ന് രാവിലെ നടത്തിയ പരിശോധനയില് ദിവ്യയുടേതെന്ന് കരുതുന്ന ആത്മഹത്യകുറിപ്പ് പോലീസ് കണ്ടെടുത്തു. ‘ഞാന് പോകുന്നു’ എന്ന് മാത്രമാണ് കത്തില് എഴുതിയിരുന്നത്.
ഓണ്ലൈന് ക്ലാസില് പങ്കെടുക്കാന് പറ്റാത്തതിന്റെ വിഷമം മകള് പങ്കുവെച്ചിരുന്നതായി മാതാപിതാക്കള് പറഞ്ഞു. പണം ഇല്ലാത്തതിനാല് കേടായ ടിവി നന്നാക്കാന് കഴിയാഞ്ഞതും സ്മാര്ട്ട് ഫോണ് ഇല്ലാത്തതും കുട്ടിയെ മാനസികമായി തളര്ത്തിയിരുന്നു. കൂലിപ്പണിക്കാരനായ അച്ഛന് രോഗത്തെ തുടര്ന്ന് പണിക്കുപോകാന് കഴിഞ്ഞിരുന്നില്ല. പഠിക്കാന് മിടുക്കിയായിരുന്ന ദേവിക പഠനം തടസപ്പെടുമോയെന്ന് ആശങ്കപ്പെട്ടിരുന്നുവെന്നും ബന്ധുക്കള് പറഞ്ഞു. സംഭവത്തില് വിദ്യാഭ്യാസ വകുപ്പ് പോലീസിനോട് റിപ്പോര്ട്ട് ആവശ്യപ്പെട്ടിട്ടുണ്ട്.
ദേവനന്ദ, ദീക്ഷിത്, ഏഴു മാസം പ്രായമുള്ള ആണ്കുട്ടി എന്നിവരാണ് ദേവികയുടെ സഹോദരങ്ങള്.
ജന്മഭൂമി ഓണ്ലൈന്