ശ്രീനഗര്‍ : ലഷ്‌കര്‍ ഇ തോയ്ബ ഭീകരരില്‍ ഒരാള്‍ ജമ്മു കശ്മീരില്‍ പിടിയില്‍. സുരക്ഷാ സേന ബദ്ഗാം പ്രവിശ്യയിലെ ഇവരുടെ ഒളിത്താവളവും കണ്ടെത്തി. ഭീകരര്‍ക്കായി തെരച്ചില്‍ നടത്തുന്നതിനിടെയാണ് ഇയാള്‍ പിടിയിലായത്. സഹൂര്‍വാനിയെന്ന ഭീകരനാണ് പിടിയിലായത്.
ഖാന്‍സാഹിബ് തെഹ്സിലിനു താഴെയുള്ള അരിസാല്‍ ഗ്രാമത്തില്‍, ഇയാളുടെ വീട്ടില്‍ നിന്നും 300 മീറ്റര്‍ മാറിയാണ് ഭീകരര്‍ക്കുള്ള ഒളിത്താവളം തയ്യാറാക്കിയിരുന്നത്. ഒളിത്താവളത്തില്‍ നിന്നും സഹൂര്‍വാനിയുടെ ആയുധങ്ങളും പോലീസ് കണ്ടെടുത്തു.
ലഷ്‌കര്‍ ഭീകരര്‍ക്കുള്ള വാഹനസൗകര്യം, ബാരമുള്ളയിലേക്ക് ചരക്കു നീക്കത്തിനുള്ള സംവിധാനങ്ങള്‍ എന്നിവ ഏര്‍പ്പാടാക്കി കൊടുക്കുന്നതും സഹൂര്‍ ആണെന്ന തെളിവുകള്‍ സുരക്ഷാ സേനക്ക് ലഭിച്ചിട്ടുണ്ട്. ഇതുമായി ബന്ധപ്പെട്ട് സുരക്ഷാ സേന ഇയാളെ ചോദ്യം ചെയ്തു വരികയാണ്.
പ്രദേശത്തെ ലഷ്‌കറിന്റെ ഭീകരരെ കുറിച്ചുള്ള സൂചനകള്‍ ഇയാളില്‍ നിന്നും ലഭിച്ചേക്കുമെന്നാണ് പ്രതീക്ഷിക്കുന്നത്. അതേസമയം പ്രദേശത്ത് ഇനിയും ഭീകരരുടെ സാന്നിധ്യമുണ്ടോയെന്ന് തെരച്ചില്‍ നടത്തി വരികയാണ്.
