തിരുവനന്തപുരം: ഇതര സംസ്ഥാനത്തെ മലയാളികളെ തിരികെയെത്തിക്കുന്നതില്‍ സംസ്ഥാന സര്‍ക്കാര്‍ അലംഭാവം കാണിക്കുന്നുവെന്ന് ബിജെപി ജില്ലാ പ്രസിഡന്റ് വി.വി. രാജേഷ്. അതിര്‍ത്തികളില്‍ എത്തിയ മലയാളികള്‍ കേരളത്തിലേക്ക് പ്രവേശിക്കാന്‍ കഴിയാതെ അലഞ്ഞുതിരിയുകയാണ്. ഇവര്‍ക്ക് മഴയും വെയിലുമേല്‍ക്കാതെ വിശ്രമിക്കാന്‍ പോലും സൗകര്യം നല്‍കിയിട്ടില്ല. ഗര്‍ഭിണികളും പെണ്‍കുട്ടികളും ഉള്‍പ്പെടെ വന്നുചേര്‍ന്നിട്ടുള്ള ഇത്തരക്കാരുടെ പ്രാഥമിക ആവശ്യങ്ങള്‍ നിര്‍വഹിക്കാന്‍ ഒരു സൗകര്യവും ഒരുക്കിയിട്ടില്ല.
വിദേശരാജ്യങ്ങളില്‍ നിന്ന് തിരികെയെത്തണമെന്ന് ആവശ്യപ്പെട്ട പ്രവാസികളുടെ കാര്യത്തില്‍ കേന്ദ്ര സര്‍ക്കാര്‍ ഇടപെട്ട് സുരക്ഷിതമായി തിരികെയെത്തിച്ചു തുടങ്ങിയതോടെ കുറച്ച് ആശ്വാസമായിട്ടുണ്ട്. എന്നാല്‍ ജില്ലയില്‍ നിന്ന് ഇതര സംസ്ഥാനങ്ങളില്‍ പഠനത്തിനും തീര്‍ഥാടനത്തിനും മറ്റ് ആവശ്യങ്ങള്‍ക്കുമായി പോയവര്‍ കഴിഞ്ഞ 45 ദിവസമായി വിവിധ സംസ്ഥാനങ്ങളില്‍ കുടുങ്ങിക്കിടക്കുകയാണ്. പ്രസവ തീയതി അടുത്തുവരുന്ന ഗര്‍ഭിണികള്‍ ഇടവേളകളിലെ പരിശോധനയ്‌ക്ക് ആശുപത്രികളില്‍ എത്താന്‍ കഴിയാത്തതിന്റെ ആകുലതകളിലാണ്. തിരികെ വരാന്‍ ആഗ്രഹിക്കുന്നവര്‍ക്ക് വേണ്ടി തുടങ്ങിയ നോര്‍ക്കയുടെ വെബ്‌സൈറ്റില്‍ കയറി രജിസ്റ്റര്‍ ചെയ്യാന്‍ പലപ്പോഴും കഴിയുന്നില്ല.
ഇതര സംസ്ഥാനങ്ങളില്‍ നിന്നുള്ള മലയാളികളെ പരമാവധി കേരളത്തില്‍ എത്തിക്കാതിരിക്കാനാണ് സംസ്ഥാന സര്‍ക്കാര്‍ ശ്രമിക്കുന്നത്. ഇതരസംസ്ഥാനക്കാരെ സ്വന്തം സംസ്ഥാനങ്ങളിലേക്ക് എത്തിക്കുന്നതിന് വേണ്ട നിര്‍ദേശങ്ങള്‍ അടങ്ങിയ ഉത്തരവ് റെയില്‍വെ മെയ് 1ന് ഇറക്കിയിരുന്നു. എട്ടു ദിവസം കാത്തശേഷം കഴിഞ്ഞ ദിവസമാണ് കേരള മുഖ്യമന്ത്രി ഇതിനോട് പ്രതികരിച്ചത്. ഏകോപനം ഉണ്ടാക്കാനെന്ന് പറഞ്ഞ് ദല്‍ഹിയില്‍ നിയമിച്ച എ. സമ്പത്തിന്റെ ഭാഗത്ത് നിന്ന് എന്ത് സഹായമാണ് ഇതര സംസ്ഥാനത്തെ മലയാളികള്‍ക്ക് ലഭിച്ചതെന്നറിയാന്‍ ജനങ്ങള്‍ക്ക് താല്‍പ്പര്യമുണ്ടെന്നും അദ്ദേഹം പറഞ്ഞു.
