ന്യൂദല്ഹി: ലോകരാജ്യങ്ങളിലെല്ലാം മരണത്തിന്റെ ഭീതി പടര്ത്തിയ കൊറോണക്കെതിരെ രാജ്യം ഒറ്റക്കെട്ടായി പോരാടുകയാണ്. ലോക്ക്ഡൗണ് ഉള്പ്പെടെയുള്ള സമയോചിതമായ തീരുമാനങ്ങള് കൈക്കൊണ്ട് രാജ്യം വൈറസ് വ്യാപനത്തെ വലിയ രീതിയില് തടഞ്ഞു. ഇങ്ങനെ അടിയന്തിരമായ കൈക്കൊള്ളേണ്ടിവന്ന അടച്ചുപൂട്ടലില് കഷ്ടത അനുഭവിക്കുന്ന രാഷ്ട്രത്തിലെ ജനങ്ങള്ക്കിടയില് സേവനത്തിന്റെ കരം പകര്ന്നിരിക്കുകയാണ് ആര്എസ്എസ്.
ഭക്ഷണത്തിന് ബുദ്ധമുട്ടിയിരുന്ന ജനങ്ങള്ക്കിടയില് ഭക്ഷണപ്പൊതികളും ആവശ്യ സാധനങ്ങള് അടങ്ങുന്ന കിറ്റും ആര്എസ്എസ് എത്തിച്ചു. ഇത്തരത്തില് മൂന്നുകോടി ഇരുപത് ലക്ഷത്തിലധികം ഭക്ഷണപ്പൊതികളും 50 ലക്ഷത്തിലധികം കുടുംബങ്ങളില് ധാന്യങ്ങളും അവശ്യസാധങ്ങളും അടങ്ങിയ കിറ്റുകളും വിതരണം ചെയ്തു. കൂടാതെ രോഗ പകര്ച്ച തടയുവാനായി 44 ലക്ഷത്തിലധികം മാസ്കുകളും സംഘം സമൂഹത്തിനിടയില് എത്തിച്ചു.
രോഗ ബോധവത്കരണത്തിനും ആഹാര സാധനങ്ങളുടെ വിതരണത്തിനുമായി സേവാകേന്ദ്രങ്ങള് പ്രവര്ത്തിപ്പിച്ചു. മേയ് 2 വരെ മാത്രം ഇത്തരത്തില് 67,336 കേന്ദ്രങ്ങള് രാജ്യത്തിന്റെ വിവിധ ഭാഗങ്ങളിലായി ആര്എസ്എസ് ആരംഭിച്ചു. 3,42,319 വോളന്റിയര്മാര് പ്രവര്ത്തനങ്ങളെ ഏകോപിപ്പിക്കാന് മുഴുവന് സമയവും പ്രവര്ത്തിച്ചതായും പുറത്തുവിട്ട റിപ്പോര്ട്ടില് പറയുന്നു.
ലോക്ക് ഡൗണ് കാലത്ത് അടിയന്തിര ശസ്ത്രക്രിയകള്ക്ക് പോലും രക്തം ലഭിക്കാത്ത സാഹചര്യമുണ്ടായി. എന്നാല് സാഹചര്യങ്ങള് കണക്കിലെടുത്ത് 22, 446 പ്രവര്ത്തകര് അടിയന്തിര സാഹചര്യങ്ങളില് രക്തദാനം നടത്തുകയും ചെയ്തു.
ബുദ്ധിമുട്ട് നേരിടുന്ന ജനങ്ങളെ സഹായിക്കണമെന്ന് ലോക്ക്ഡൗണിന്റെ പ്രാരംഭത്തില് തന്നെ ആര്എസ്എസ് പ്രവര്ത്തകര്ക്ക് നിര്ദേശം നല്കിയിരുന്നു. കഴിഞ്ഞയാഴ്ച നടത്തിയ അഭിസംബോധനയില് അടിയന്തിര സാഹചര്യങ്ങളില് സ്വയംസേവകര് ചെയ്യേണ്ട കടമകളെ കുറിച്ച് സര്സംഘചാലക് മോഹന് ഭാഗവത് സംസാരിച്ചിരുന്നു.
