‘ട്രംപ് വിരട്ടി, മോദി മുട്ടുമടക്കി’ പെരുംനുണ വിളമ്പുന്ന മലയാള മാധ്യമങ്ങള്‍; യു പ്രതിഭ എംഎല്‍എയ്‌ക്ക് നല്ല നമസ്‌കാരം

കൊറോണ എന്ന രാക്ഷസ ഭീതിയിലാണ് ലോകം. ഇരുന്നൂറോളം രാജ്യങ്ങളില്‍ കൊറോണ എത്തി. ചൈനയില്‍ തുടങ്ങി അയല്‍ രാജ്യങ്ങളിലും കയറി കയറി അങ്ങ് അമേരിക്കയിലിപ്പോള്‍ കൊറോണ മരണ നൃത്തമാടുകയാണ്. 12 മണിക്കൂറിനകം 1000 എന്ന കണക്കിലാണ് മരണം. ലോക പോലീസായി പെരുമാറിയിരുന്ന അമേരിക്കയും അതിന്റെ ഭരണത്തലവനും ഭയംമൂലം വിറങ്ങലിക്കുകയാണ്. എന്തു ചെയ്യണമെന്നുപോലും നിശ്ചയമില്ലാതായപ്പോഴാണ് ഉറ്റസുഹൃത്ത് ഇന്ത്യന്‍ പ്രധാനമന്ത്രി നരേന്ദ്രമോദിയെ ഫോണില്‍  ബന്ധപ്പെട്ടത്. കോറോണയെ പ്രതിരോധിക്കാന്‍ മരുന്നുവേണമെന്നായിരുന്നു ആവശ്യം.

ഏപ്രില്‍ 5 ഞായറാഴ്ചയാണ് ട്രംപ് മോദിയെ വിളിച്ചത്. ഇന്ത്യ കയറ്റുമതി നിരോധിച്ച ഹൈഡ്രോക്സി ക്ലോറോക്വിന്‍ മരുന്ന് വേണമെന്നാവശ്യപ്പെട്ടു. ഞായറാഴ്ചയ്‌ക്ക് ഇന്ത്യയില്‍ പ്രത്യേകതയുണ്ട്. അന്നാണ് കോറോണ പരത്തിയ അന്ധകാരം അകറ്റാനും പ്രതിരോധ പ്രവര്‍ത്തകര്‍ക്ക് ഊര്‍ജ്ജം പകരാനും ദീപപ്രകാശനം നടത്തിയത്. പിറ്റേദിവസം തിങ്കളാഴ്ച ആവശ്യമായ കൂടിയാലോചനയ്‌ക്കുശേഷം അമേരിക്കയ്‌ക്ക് മരുന്ന് നല്‍കാന്‍ കേന്ദ്രം തീരുമാനിച്ചു. അന്ന് അമേരിക്കയില്‍ മാധ്യമപ്രവര്‍ത്തകരുമായി കണ്ടപ്പോള്‍ ട്രംപിനോട് ഒരാള്‍ ചോദിച്ചു.

‘അമേരിക്ക പല രാജ്യങ്ങള്‍ക്കും മരുന്ന് നല്‍കാതിരുന്നിട്ടുണ്ടല്ലോ. അതിന്റെ തിരിച്ചടിയാകുമോ ഇന്ത്യ മരുന്ന് നല്‍കാത്തത്’. ‘ഞായറാഴ്ചയാണ് മരുന്നിന്റെ കാര്യം മോദിയുമായി സംസാരിച്ചത്. തരുമായിരിക്കും. തന്നില്ലെങ്കില്‍ തിരിച്ചടിയാകും.” ട്രംപിന്റെ ഈ മറുപടിയാണ് ചില മാധ്യമങ്ങള്‍ വളച്ചൊടിച്ചത്. ”തിരിച്ചടിക്കുമെന്ന് ട്രംപ്, ഇന്ത്യ മുട്ടുമടക്കി.” അമേരിക്കയ്‌ക്ക് മരുന്ന് നല്‍കും. മലയാളത്തിലെ മുത്തശ്ശി പത്രം ഒന്നാംപേജിലെ മുഖ്യവാര്‍ത്തയാക്കി. അതേമട്ടില്‍ മറ്റുചിലരും. ചാനലുകള്‍ ആഘോഷിച്ചു. മോദിക്കെതിരെ കിട്ടിയ ഒന്നാന്തരം പകിട്ടുള്ള വാര്‍ത്തയെന്ന മട്ടില്‍.

ചൊവ്വാഴ്ച ഗുജറാത്തില്‍ നിന്നും 29 മില്യന്‍ ഡോസ് മരുന്നാണ് അമേരിക്കയ്‌ക്ക് നല്‍കിയത്. ആവശ്യപ്പെട്ട 30 രാജ്യങ്ങള്‍ക്കും മരുന്നു നല്‍കുന്നു. മോദി കീഴടങ്ങി എന്ന വാര്‍ത്ത പെരുംനുണയാണെന്ന് മാധ്യമങ്ങളും അരിയാഹാരം കഴിക്കുന്ന സര്‍വര്‍ക്കും ബോധ്യമായി. എന്നിട്ടും ഒരു തിരുത്തുപോലും കൊടുക്കാത്ത മാധ്യമങ്ങളെ എന്ത് വിളിക്കണം? ഇതൊക്കെ കാണുമ്പോള്‍ യു.പ്രതിഭയ്‌ക്ക് നല്ല നമസ്‌കാരം നല്‍കണമെന്ന് ആര്‍ക്കും തോന്നിപ്പോകും.

പത്രങ്ങളും കോവിഡ് പരുത്തുമെന്ന് ഏതോ കുബുദ്ധി പ്രചരിപ്പിച്ചപ്പോള്‍ നടുങ്ങിയ മുഖ്യധാരാ പത്രങ്ങള്‍ അവരുടെ ചാനലുകളില്‍ നല്‍കുന്ന പരസ്യങ്ങള്‍ ശ്രദ്ധേയമാണ്. ‘അണുവിമുക്തമാക്കിയ പ്രസില്‍ അച്ചടിക്കുന്നതും കൈകൊണ്ട് തൊടാതെ എണ്ണുന്നതും പായ്‌ക്ക് ചെയ്യുന്നതുമൊക്കെ കാണിക്കുന്നതാണത്. അച്ചടിക്കുമ്പോള്‍ ആരും കൈകൊണ്ട് തൊടാതെ കള്ളം നിരന്തരം വിളമ്പിയാല്‍ വരിക്കാരും വായനക്കാരും ഈ പത്രങ്ങള്‍ നികൃഷ്ടവസ്തുവായി കണ്ട് കൈകൊണ്ട് തൊടാന്‍ മടിച്ചുനില്‍ക്കുന്ന നേരം ദൂരെയല്ല.