പത്തനംതിട്ട: ക്ഷേത്രങ്ങളില് ഭക്തര്ക്ക് പ്രവേശനം ഇല്ലെങ്കിലും വഴിപാട് നടത്താനുള്ള അവസരം ഒരുക്കിയിട്ടുണ്ടെന്ന അറിയിപ്പുമായി തിരുവിതാംകൂര് ദേവസ്വം ബോര്ഡ്. വഴിപാട് നടത്താന് ആഗ്രഹിക്കുന്ന ഭക്തര് ദേവസ്വം ബോര്ഡ് വക ക്ഷേത്രങ്ങളിലെ അഡ്മിനിസ്ട്രേറ്റീവ് ഓഫീസര്മാരുമായോ സബ് ഗ്രൂപ്പ് ഓഫീസര്മാരുമായോ ബന്ധപ്പെട്ടാല് വഴിപാട് നടത്താമെന്നാണ് നിര്ദേശം.
ലോക്ഡൗണിന്റെ ഭാഗമായി ക്ഷേത്രങ്ങളില് ഭക്തര്ക്ക് വിലക്ക് ഏര്പ്പെടുത്തിയതോടെ ദേവസ്വം ബോര്ഡിന്റെ വരുമാനം കുത്തനെ ഇടിഞ്ഞതാണ് പുതിയ നിര്ദേശത്തിനുപിന്നിലെന്നാണ് സൂചന. ദര്ശനം അനുവദിക്കാതെ വഴിപാട് നടത്താന് ഭക്തര് തയാറാകുമോ എന്നതില് ജീവനക്കാര്ക്കും ആശങ്കയുണ്ട്.
ക്ഷേത്ര ദര്ശനത്തിനു അനുവദിക്കാതെ വഴിപാടിന് പണം മാത്രം നല്കുന്നത് എന്തിനെന്ന ചോദ്യമാണ് ഭക്തര് ഉയര്ത്തുന്നത്. ക്ഷേത്രങ്ങളെ ധനസമ്പാദനത്തിന് മാത്രമായുള്ള ഉപകരണം എന്ന നിലയിലുള്ള കാഴ്ചപ്പാടാണ് ഭക്തരെത്തിയില്ലെങ്കിലും വഴിപാട് നടത്താം എന്ന ബോര്ഡിന്റെ നിര്ദേശത്തിനു പിന്നിലെന്നും ചൂണ്ടിക്കാണിക്കുന്നു.
തിരുവിതാംകൂര് ദേവസ്വം ബോര്ഡ് വന് സാമ്പത്തിക പ്രതിസന്ധി അഭിമുഖീകരിക്കുകയാണെന്ന് കഴിഞ്ഞദിവസം ബോര്ഡ് പ്രസിഡന്റുതന്നെ പറഞ്ഞിരുന്നു. ബോര്ഡിലെ ദിവസ വേതനക്കാരൊഴികെയുള്ള മുഴുവന് ജീവനക്കാരും ഒരുമാസത്തെ ശമ്പളം തിരുവിതാംകൂര് ദേവസ്വം ബോര്ഡിന്റെ ടെമ്പിള് റിനവേഷന് ഫണ്ടിലേക്ക് സംഭാവന ചെയ്യണമെന്ന ആവശ്യവും ബോര്ഡ് മുന്നോട്ടുവച്ചിട്ടുണ്ട്.
