തിരുവനന്തപുരം: അന്യസംസ്ഥാന തൊഴിലാളികളെ അതിഥി തൊഴിലാളികളെന്ന് ചില മാധ്യമങ്ങളും സര്ക്കാരും വിളിക്കുന്നത് ആസൂത്രിതമായ ഗൂഢാലോചനയുടെ ഭാഗമാണെന്ന് ബിജെപി സംസ്ഥാന വക്താവ് സന്ദീപ് വാര്യര്.
കേരളം ഒരു രാജ്യം അല്ലാത്തതിനാലും ഇന്ത്യയുടെ ഭാഗമായതിനാലും അന്യസംസ്ഥാന തൊഴിലാളികളെ അതിഥി തൊഴിലാളി എന്ന് വിളിക്കുന്നത് രാജ്യദ്രോഹമാണ്. ദല്ഹിയില് ജോലി ചെയ്യുന്ന മലയാളികള് അവിടെ അതിഥിയാണോ? തമിഴ്നാട്ടില് ജോലി ചെയ്യുന്ന മലയാളികള് അവിടെ അതിഥിയാണോ? അതിഥിക്ക് ഒട്ടേറെ പരിമിതികളുണ്ട്. അതിഥിക്ക് ഒരിക്കലും വീട്ടുകാരനായി മാറാന് കഴിയില്ലെന്നും സന്ദീപ് വാര്യര് ഫെയ്സ്ബുക്കിലൂടെ വ്യക്തമാക്കി.
അതിഥി തൊഴിലാളികള്ക്ക് തിരിച്ചറിയല് കാര്ഡ് കൊടുക്കും എന്ന് മുഖ്യമന്ത്രി പറയുന്നതിന് പിറകില് വലിയ ഗൂഢാലോചനയുണ്ട്. അന്യസംസ്ഥാന തൊഴിലാളികള്ക്ക് ആധാറും ഇലക്ഷന് കമ്മീഷന് ഐഡന്റിറ്റി കാര്ഡും ഉണ്ട് . പിന്നെ കേരളം എന്തിനാണ് പ്രത്യേകിച്ചൊരു കാര്ഡ് കൊടുക്കുന്നതെന്നും സന്ദീപ് ചോദിക്കുന്നു.
പായിപ്പാടും പെരുമ്പാവൂരും പട്ടാമ്പിയിലും എല്ലാം നാടിന് പ്രതിസന്ധി ഉണ്ടാക്കുന്നത് നുഴഞ്ഞുകയറ്റക്കാരായ ബംഗ്ലാദേശികള് ആണ്. യഥാര്ത്ഥ പ്രശ്നത്തെ അഭിമുഖീകരിക്കാതെ നമുക്ക് എത്രകാലം മുന്നോട്ടു പോകാന് കഴിയും എന്നുള്ളതാണ് മലയാളി നേരിടുന്ന ചോദ്യം. അതിന് ഉത്തരം കണ്ടെത്തിയ മതിയാകൂ. ഈ സത്യം വിളിച്ചു പറയുന്നവരെ വര്ഗീയവാദി ചാപ്പകുത്തിയതു കൊണ്ട് സത്യം സത്യമല്ലാതാകുന്നില്ലെന്നും സന്ദീപ് വാര്യര് തുറന്നടിച്ചു.
ഫെയ്സ്ബുക്ക് പോസ്റ്റിന്റെ പൂര്ണരൂപം:
കഴിഞ്ഞ കുറച്ചു ദിവസമായി മാധ്യമങ്ങളും സര്ക്കാരും അതിഥി തൊഴിലാളി എന്ന വാക്ക് ഉപയോഗിക്കുന്നത് ആസൂത്രിതമായ ഗൂഢാലോചനയുടെ ഭാഗമാണ്. അന്യസംസ്ഥാന തൊഴിലാളികളെ അതിഥി തൊഴിലാളികള് എന്ന് വിളിക്കേണ്ടതില്ല. ഇന്ത്യക്കാരായ അവര്ക്ക് കേരളത്തില് ഭൂമി വാങ്ങാനോ ഇവിടെ സ്ഥിരതാമസക്കാരാവാനോ നിയമപരമായ യാതൊരു വിലക്കുമില്ല. അവര്ക്ക് കേരളത്തിലേക്ക് വരാന് പാസ്പോര്ട്ടോ വിസയോ ആവശ്യമില്ല.
കേരളം ഒരു രാജ്യം അല്ലാത്തതിനാലും ഇന്ത്യയുടെ ഭാഗമായതിനാലും അന്യസംസ്ഥാന തൊഴിലാളികളെ അതിഥി തൊഴിലാളി എന്ന് വിളിക്കുന്നത് രാജ്യദ്രോഹമാണ്. ഡല്ഹിയില് ജോലി ചെയ്യുന്ന മലയാളികള് അവിടെ അതിഥിയാണോ ? തമിഴ്നാട്ടില് ജോലി ചെയ്യുന്ന മലയാളികള് അവിടെ അതിഥിയാണോ ? അതിഥിക്ക് ഒട്ടേറെ പരിമിതികളുണ്ട്. അതിഥിക്ക് ഒരിക്കലും വീട്ടുകാരനായി മാറാന് കഴിയില്ല.
എന്നാല് അന്യ സംസ്ഥാന തൊഴിലാളികളുടെ മറവില് ബംഗ്ലാദേശികളെ അതിഥികളായി വിശേഷിപ്പിക്കുന്ന ഏര്പ്പാട് നടക്കില്ല. ബംഗ്ളാദേശികളെയാണെങ്കില് നുഴഞ്ഞ് കയറ്റക്കാര് എന്നാണ് വിളിക്കേണ്ടത് . അവര് അതിഥികളല്ല. ക്ഷണിക്കാതെ വലിഞ്ഞുകയറി വന്നവരാണ്.
അതിഥി തൊഴിലാളികള്ക്ക് തിരിച്ചറിയല് കാര്ഡ് കൊടുക്കും എന്ന് മുഖ്യമന്ത്രി പറയുന്നതിന് പിറകില് വലിയ ഗൂഢാലോചനയുണ്ട്. അന്യസംസ്ഥാന തൊഴിലാളികള്ക്ക് ആധാറും ഇലക്ഷന് കമ്മീഷന് ഐഡന്റിറ്റി കാര്ഡും ഉണ്ട് . പിന്നെ കേരളം എന്തിനാണ് പ്രത്യേകിച്ചൊരു കാര്ഡ് കൊടുക്കുന്നത്? അത്തരമൊരു കാര്ഡ് ഇഷ്യൂ ചെയ്ത് ബംഗ്ലാദേശികള് ഇവിടെ തുടരുന്നതിന് ക്ലെയിം കൊടുക്കുകയാണ് പിണറായി വിജയന്റെ ഉദ്ദേശം. നുഴഞ്ഞുകയറ്റക്കാര്ക്ക് നിയമപരമായ എന്തെങ്കിലുമൊരു രേഖയുണ്ടാക്കി നല്കുക. ഈ രാജ്യത്തോട് ചെയ്യാവുന്ന ഏറ്റവും വലിയ ദ്രോഹമാണ് പിണറായി സര്ക്കാര് ചെയ്യാന് പോകുന്നത്.
പായിപ്പാടും പെരുമ്പാവൂരും പട്ടാമ്പിയിലും എല്ലാം നാടിന് പ്രതിസന്ധി ഉണ്ടാക്കുന്നത് നുഴഞ്ഞുകയറ്റക്കാരായ ബംഗ്ലാദേശികള് ആണ്. ഒരു ചാനല് ചര്ച്ചക്കിടെ പായിപ്പാട്കാരനായ സിപിഎം ജനപ്രതിനിധി തന്നെ ഇക്കാര്യം പറയുന്നത് കേട്ടു. അവതാരക അദ്ദേഹത്തെ പറയാന് അനുവദിക്കാതെ വിഷയം ഗതി മാറ്റി.
യഥാര്ത്ഥ പ്രശ്നത്തെ അഭിമുഖീകരിക്കാതെ നമുക്ക് എത്രകാലം മുന്നോട്ടു പോകാന് കഴിയും എന്നുള്ളതാണ് മലയാളി നേരിടുന്ന ചോദ്യം. അതിന് ഉത്തരം കണ്ടെത്തിയ മതിയാകൂ. ഈ സത്യം വിളിച്ചു പറയുന്നവരെ വര്ഗീയവാദി ചാപ്പകുത്തിയതു കൊണ്ട് സത്യം സത്യമല്ലാതാകുന്നില്ല.
