ന്യൂദല്‍ഹി : കൊറോണ വൈറസ് പ്രതിരോധത്തിന് താല്‍ക്കാലികമായി ഉപയോഗിക്കുന്ന മരുന്ന് കയറ്റുമതി ചെയ്യുന്നതിന് കേന്ദ്രം വിലക്ക് ഏര്‍പ്പെടുത്തി. മലേറിയ ഒഴിവാക്കാനും ചികിത്സയ്‌ക്കുമായി ഉപയോഗിച്ചിരുന്ന ഹൈഡ്രോക്സി ക്ലോറോക്വിന്‍ എന്ന മരുന്ന് ഇന്ത്യയില്‍ നിന്ന് കയറ്റുമതി ചെയ്യുന്നതാണ് നിര്‍ത്തിവെച്ചത്. ആഭ്യന്തര വിപണിയില്‍ ആവശ്യത്തിന് മരുന്നിന്റെ ലഭ്യത ഉറപ്പ് വരുത്തുന്നതിനായാണ് ഈ തീരുമാനമെന്നാണ് പുറത്തുവരുന്ന റിപ്പോര്‍ട്ട്.
ഹൈഡ്രോക്സി ക്ലോറോക്വിനു രോഗം ഭേദമാക്കാന്‍ ശേഷിയുണ്ടെന്ന പ്രതീക്ഷ നേരത്തേ യുഎസ് പ്രസിഡന്റ് ഡൊണാള്‍ഡ് ട്രംപ് പത്രസമ്മേളനത്തില്‍ പറഞ്ഞിരുന്നു. തുടര്‍ന്ന് ബുധനാഴ്ച വാണിജ്യ മന്ത്രാലയത്തിന്റെ കീഴിലുള്ള വാണിജ്യ മന്ത്രാലയത്തിന്റെ കീഴിലുള്ള ഡയറക്ടറേറ്റ് ജനറല്‍ ഓഫ് ഫോറിന്‍ ട്രേഡ് (ഡിജിഎഫ്ടി) ആണ് കയറ്റുമതി നിരോധിച്ച് വിജ്ഞാപനമിറക്കിയത്. കോവിഡിന് നിലവില്‍ വാക്സിനോ മരുന്നോ കണ്ടുപിടിച്ചിട്ടില്ല. ഹൈഡ്രോക്സി ക്ലോറോക്വിന്‍ എന്ന കോവിഡിനും ഫലപ്രദമാണെന്നു കഴിഞ്ഞദിവസം ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് (ഐസിഎംആര്‍) ഡയറക്ടര്‍ ജനറല്‍ ബല്‍റാം ഭാര്‍ഗവ് വ്യക്തമാക്കിയിരുന്നു.
സാര്‍സ് രോഗത്തിനെതിരെ ഉപയോഗിച്ചു ഫലം ചെയ്തതിന്റെ മുന്നനുഭവവും നിലവിലെ ലബോറട്ടറി പഠനങ്ങള്‍ നല്‍കിയ പ്രചോദനത്താലാണ് മെഡിക്കല്‍ കൗണ്‍സില്‍ ഈ ‘പഴയ മരുന്നിന്’ അംഗീകാരം നല്‍കിയിരിക്കുന്നതെന്ന് ദേശീയമാധ്യമങ്ങള്‍ റിപ്പോര്‍ട്ട് ചെയ്യുന്നു. ഈ ‘പഴയ മരുന്നിന്റെ’ പുതിയ ഉപയോഗം ഇന്ത്യന്‍ മെഡിക്കല്‍ കൗണ്‍സില്‍ ഇക്കാര്യം ശരിവച്ചതോടെ പലരാജ്യങ്ങളിലും മരുന്നിന്റെ ആവശ്യവും കയറ്റുമതിയും കൂടി. എന്നാല്‍ ലോക്ഡൗണ്‍ പ്രഖ്യാപിച്ച സാഹചര്യത്തില്‍ മരുന്നിന് രാജ്യത്തിനകത്ത് ആവശ്യം കൂടുമെന്നത് കണക്കിലെടുത്താണു തീരുമാനമെന്നും ദേശീയ മാധ്യമങ്ങള്‍ പറയുന്നു.
കോവിഡ് രോഗികളെയോ രോഗം സംശയിച്ചവരെയോ ചികിത്സിക്കുന്നവര്‍ക്കും സ്വന്തം വീടുകളില്‍ ക്വാറന്റീന്‍ ചെയ്യപ്പെട്ട രോഗികളുമായി ഇടപഴകിയവര്‍ക്കാണു മരുന്നു നല്‍കുക. വൈറസ് ബാധയ്‌ക്ക് ഏറെ സാധ്യതയുള്ള വിഭാഗമെന്ന ഗണപ്പെടുത്തില്‍പ്പെടുത്തിയാണ് ഇവര്‍ക്ക് ഹൈഡ്രോക്സി ക്ലോറോക്വിന്‍ നല്‍കാന്‍ മെഡിക്കല്‍ കൗണ്‍സില്‍ ശുപാര്‍ശ ചെയ്തിരിക്കുന്നത്. ഡോക്ടര്‍മാരുടെ നിര്‍ദേശപ്രകാരം മാത്രമെ മരുന്ന് ഉപയോഗിക്കാവൂ എന്ന കര്‍ശന നിര്‍ദേശവും പുറത്തിറക്കിയിട്ടുണ്ട്.
പ്രതികരിക്കാൻ ഇവിടെ എഴുതുക