കൊല്ലം: ഇളവൂരിൽ ഏഴുവയസുകാരി ദേവനന്ദ പുഴയിൽ മുങ്ങി മരിച്ച സംഭവത്തിലെ ദുരൂഹത നീങ്ങിയില്ല. അന്വേഷണ സംഘം ഇന്ന് വീണ്ടും കുട്ടിയുടെ മാതാപിതാക്കളുടെ മൊഴിയെടുക്കും. അമ്മ ധന്യയുടെ മൊഴി നേരത്തെ രണ്ടുതവണ പോലീസ് രേഖപ്പെടുത്തിയിരുന്നു.
കുട്ടി മരിച്ചതിന്റെ മനോവേദനയിൽ നിന്ന് ഏറെക്കുറെ മുക്തയായ ശേഷമാണ് ഇന്ന് വീണ്ടും രക്ഷിതാക്കളെ കാണാൻ നിശ്ചയിച്ചിട്ടുള്ളത്. പോലീസിന്റെ സംശയങ്ങൾ, രക്ഷിതാക്കളുടെ സംശയങ്ങൾ, ചോദ്യം ചെയ്തവരിൽ നിന്ന് ലഭിച്ച വിവരങ്ങൾ എന്നിവയുടെ അടിസ്ഥാനത്തിലാകും ഇന്ന് മൊഴി രേഖപ്പെടുത്തുക. ഇതുവരെ 61 പേരെ ചോദ്യം ചെയ്തതായി അന്വേഷണ ഉദ്യോഗസ്ഥർ അറിയിച്ചു. ഫോറൻസിക് -പോസ്റ്റുമോർട്ടം റിപ്പോർട്ടുകൾ ദേവനന്ദയുടേത് മുങ്ങിമരണമാണെന്ന് വ്യക്തമാക്കുന്നതാണ്.
പുഴയിൽ തനിയെ വീണതാണോ ബാഹ്യ പ്രേരണയാൽ വീണതാണോയെന്ന കാര്യം ഇതിൽ നിന്ന് വ്യക്തമല്ല. അതിനാണ് ഇനിയും ഉത്തരം കിട്ടേണ്ടത്. സംഭവ ദിവസം ഇളവൂരിലെ വീടിന്റെ പരിസര പ്രദേശങ്ങളിലുണ്ടായിരുന്നവരുടെ വിവരങ്ങൾ എടുക്കാൻ സൈബർ സെല്ലിന്റെ ഉൾപ്പടെ സഹായം തേടിയിരുന്നു. മൊബൈൽ ടവർ കേന്ദ്രീകരിച്ചുള്ള വിവരങ്ങൾ ഇനിയും അന്വേഷണ സംഘത്തിന് ലഭിച്ചിട്ടില്ല. ഇത് ലഭിക്കുന്നതോടെ നിലവിലുള്ള സംശയങ്ങൾക്ക് തുമ്പുണ്ടാകുമെന്നാണ് പ്രതീക്ഷ.
സംഭവ ദിവസം സ്ഥലത്തുണ്ടായിരുന്നുവെന്ന് പറയപ്പെടുന്ന യുവാവിനെപ്പറ്റി അന്വേഷിക്കുന്നുണ്ട്. മറ്റ് സംശയങ്ങളും ബലപ്പെടുകയാണ്. കുട്ടി സ്വാഭാവികമായും പുഴയിൽ വീണ് മരിച്ചതാണെന്ന് വിശ്വസിക്കാൻ ബന്ധുക്കൾക്കും നാട്ടുകാർക്കും കഴിഞ്ഞിരുന്നില്ല. ഫോറൻസിക്-പോസ്റ്റുമോർട്ടം റിപ്പോർട്ടുകൾ ലഭിച്ചിട്ടും കേസന്വേഷണം ഊർജ്ജിതമാക്കാൻ അന്വേഷണ സംഘം തീരുമാനിച്ചത് സംശയങ്ങളുടെ അടിസ്ഥാനത്തിൽത്തന്നെയാണ്.
ഫെബ്രുവരി 27ന് രാവിലെ പത്തരയോടെയാണ് കുട്ടിയെ കാണാതായതും തൊട്ടടുത്ത ദിവസം രാവിലെ ഇത്തിക്കരയാറ്റിന്റെ കൈവഴിയായ പള്ളിമൺ ആറ്റിൽ നിന്ന് മൃതദേഹം കണ്ടെത്തിയതും.
