കൊട്ടാരക്കര: എം.സി റോഡില്‍ കൊട്ടാരക്കര കലയപുരത്ത് ബൈക്കുകള്‍ ജീപ്പുമായി കൂട്ടിയിടിച്ച് ബൈക്ക് യാത്രികരായ 4 വിദ്യാര്‍ത്ഥികളില്‍ രണ്ടുപേര്‍ മരിച്ചു, രണ്ട് പേര്‍ക്ക് ഗുരുതര പരിക്ക്. ഇന്നലെ രാത്രി 10 ന് കലയപുരം പെട്രോള്‍ പമ്പിന് മുന്നിലാണ് സംഭവം.
പത്തനംതിട്ട കുമ്പഴ പീരുഷ പുരയിടത്തില്‍ അഷ്‌റഫിന്റെ മകന്‍ മുഹമ്മദ് റാഷിദ് (18), കൊല്ലം പെരിനാട് അമ്പഴവയല്‍ പിറവള്ളി പടിഞ്ഞാറ്റതില്‍ അക്ബറിന്റെ മകന്‍ അല്‍ ഫഹദ് (17) എന്നിവരാണ് മരിച്ചത്. മറ്റൊരു ബൈക്കില്‍ ഒപ്പമെത്തിയ അല്‍ഫാസ് (18), ബിജിത്ത് (17) എന്നിവര്‍ക്കാണ് പരിക്കേറ്റത്. ഇവരെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. അല്‍ഫാസിന്റെ തുടയെല്ല് പൊട്ടിയ നിലയിലാണ്. അഞ്ചാലുംമൂട് പെരിനാട്ടിലെ ബന്ധുവീട്ടില്‍ പോയ ശേഷം കുമ്പഴയിലേക്ക് മടങ്ങുകയായിരുന്നു നാല്‍വര്‍ സംഘം. കലയപുരം പെട്രോള്‍ പമ്പില്‍ നിന്ന് റോഡിലേക്കിറങ്ങിയ ജീപ്പില്‍ അല്‍ഫഹദ് ഓടിച്ച ബൈക്കും തൊട്ടുപിന്നാലെ ബിജിത്ത് ഓടിച്ച ബൈക്കും ഇടിക്കുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. റോഡിലേക്ക് തെറിച്ചു വീണ നാലുപേരെയും ഉടന്‍ കൊട്ടാരക്കര താലൂക്കാശുപത്രിയില്‍ എത്തിച്ചെങ്കിലും അല്‍ഫഹദിന്റെയും റാഷിദിന്റെയും ജീവന്‍ രക്ഷിക്കാനായില്ല.
മറ്റ് രണ്ടുപേരെയും തിരുവനന്തപുരം മെഡിക്കല്‍ കോളേജ് ആശുപത്രിയിലേക്ക് മാറ്റുകയായിരുന്നു. മൃതദേഹങ്ങള്‍ ഇന്ന് രാവിലെ പോസ്റ്റുമോര്‍ട്ടത്തിന് ശേഷം ബന്ധുക്കള്‍ക്ക് വിട്ടുകൊടുക്കും. പത്തനംതിട്ട തൈക്കാവ് ഗവ.എച്ച്.എസ്.എസിലെ വിദ്യാര്‍ത്ഥികളാണ് നാലുപേരും. പത്തനംതിട്ടയില്‍ കൊലക്കച്ചവടമാണ് അല്‍ഫഹദിന്റെ പിതാവ് അക്ബറിന്. അതുകൊണ്ടാണ് താമസം അവിടേക്ക് മാറ്റിയതും തൈക്കാവ് സ്‌കൂളില്‍ ചേര്‍ത്തതും. ഇന്ന് പ്‌ളസ് വണ്‍ പരീക്ഷയെഴുതേണ്ടവരായിരുന്നു അല്‍ഫഹദും ബിജിത്തും റാഷിദും. റാഷിദിന് ഒരു മാസം മുന്‍പ് പിതാവ് വാങ്ങിക്കൊടുത്ത ബൈക്കാണ് അല്‍ഫഹദ് ഓടിച്ചിരുന്നത്. കൊല്ലത്ത് വച്ച് ബൈക്കിന് പൊലീസ് പെറ്റി അടിച്ചിരുന്നുവെന്നും ഇത് അടയ്‌ക്കാന്‍ പോകുന്നുവെന്നു പറഞ്ഞാണ് നാലുപേരും വീട്ടില്‍ നിന്നിറങ്ങിയത്. കൊട്ടാരക്കര പൊലീസ് കേസെടുത്തു.
ഇന്ന് പരീക്ഷയെഴുതാന്‍ അവരില്ല
കൂട്ടുകാരൊന്നിച്ചുള്ള ഉല്ലാസ യാത്ര മരണത്തിലേക്കായതിന്റെ ഞെട്ടലിലാണ് പത്തനംതിട്ട തൈക്കാവ് ഗവ.എച്ച്.എസ്.എസിലെ വിദ്യാര്‍ത്ഥികള്‍. അല്‍ഫാസ് പ്‌ളസ്ടുവിനും അല്‍ഫഹദും മുഹമ്മദ് റാഷിദും ബിജിത്തും പ്‌ളസ് വണ്ണിനുമാണ് പഠിക്കുന്നത്. എന്നും ഒന്നിച്ച് വരികയും പോവുകയും ചെയ്യുന്ന നാല്‍വര്‍ സംഘം കൊല്ലത്ത് ബൈക്കിന് പെറ്റി അടയ്‌ക്കാനുണ്ടെന്ന് പറഞ്ഞാണ് വീട്ടില്‍ നിന്നിറങ്ങിയത്. പെരിനാട്ടെ കുടുംബ വീട്ടിലും കൂട്ടുകാരുടെ അടുത്തുമൊക്കെ പോയ ശേഷം രാത്രി തിരികെ കുമ്പഴയിലേക്ക് മടങ്ങുമ്പോഴായിരുന്നു അപകടം. കലയപുരം പെട്രോള്‍ പമ്പില്‍ നിന്ന് റോഡിലേക്കിറങ്ങുകയായിരുന്നു ജീപ്പുമായി നാല്‍വര്‍ സംഘം സഞ്ചരിച്ച ബൈക്കുകള്‍ കൂട്ടിയിടിക്കുകയായിരുന്നു. റോഡില്‍ തെറിച്ചുവീണവരെ ഓടിക്കൂടിയവര്‍ കൊട്ടാരക്കര താലൂക്ക് ആശുപത്രിയിലേക്ക് കൊണ്ടുപോകുമ്പോള്‍ നാലുപേര്‍ക്കും ജീവന്റെ തുടിപ്പുകളുണ്ടായിരുന്നു. പിന്നെ രണ്ട് ജീവനുകള്‍ പൊലിഞ്ഞു. ഇന്ന് പരീക്ഷാ ഹാളില്‍ കൂട്ടുകാരെത്തില്ലെന്ന സങ്കടം രാവിലെയാണ് സ്‌കൂളിലെ സഹപാഠികള്‍ അറിഞ്ഞത്.
പ്രതികരിക്കാൻ ഇവിടെ എഴുതുക: